يا ترى أسعار الذهب رايحة على فين في 2025، وليه ارتفعت انهاردة بشكل صادم في سوق الصاغة في مصر، وإيه هي مؤشرات المعدن الأصفر في الشهور الباقية من السنة دي، وهل في قرارات عالمية أثرت على أسعاره وهتفضل مكملة معانا السنة.

في الساعات الأخيرة، أسعار الدهب في جميع دول العالم ومن بينها مصر، حققت قفزات كبيرة، واقترب المعدن الأصفر من تسجيل أعلى مستوياته التاريخية في الفترة الأخيرة، وده كان بسبب التوترات الجيوسياسية في منطقة الشرق الأوسط زي حرب غزة وتأثر حركة الملاحة في البحر الأحمر، وده لأن الدهب مؤشر اقتصاد عالمي مهم جدًا، وبناء على أسعاره بتحدد السياسات النقدية لدول كتيرة.

كمان، الحرب التجارية بين أمريكا وعدد من الدول زي كندا والمكسيك والتهديد بفرض رسوم جمركية على الصادرات الصينية لأمريكا، ساهمت كمان في رفع أسعار الدهب بشكل كبير، عشان يقرب من تسجيل أعلى مستوياته زي ما قولنا..

 طب يا ترى هل الوضع ده مكمل معانا لحد نهاية السنة أو للفترة الجاية، ولا ممكن الأوضاع تهدى والأسعار تنزل تاني، وفي مصر تحديدًا الأسعار ممكن تسجل كام طوال سنة 2025؟

بص يا سيدي، كل التوقعات دلوقتي بتقول أن أسعار الدهب هتستمر في تسجيل مستويات قياسية جديدة في الشهور الجاية، وده بسبب استمرار التوترات التجارية زي ما قولنا، وكمان زيادة الطلب الأمريكي على الدهب لأنه الملاذ الآمن للادخار، وكمان البنوك المركزية بتشتريه بكميات كبيرة في أوقات التوترات عشان تحوط نفسها كويس ضد أي صدمات أو أزمات اقتصادية جاية، عشان كده في احتمالية فرض تعريفات جمركية جديدة، فده هيعزز الدهب أكتر، وهيسااهم في تحقيق مزيد من الارتفاعات في الأسعار العالمية للمعدن النفيس.

كمان، ضعف وترنح الدولار الأمريكي دلوقتي، وتوجهات تخزين الدهب في الأسواق الأمريكية ساهمت في دعم الاتجاه الصعودي له، عشان كل دي تبقى أسباب في مزيد من الارتفاعات في المستقبل القريب، وده بالتأكيد هيكون له تأثير علي أسعار الدهب في مصر بالتبعية، خاصة وإن سعر الدهب المحلي مرتبط بالسعر العالمي.

نقدر نقول كمان، إن التوترات السياسية والاقتصادية في اللجوء للاستثمار في الدهب ساهمت بشكل كبير في اعتباره ملاذً آمن وقت الآزمات، فده سبب كفاية عشان يرفع من مشتريات البنوك المركزية في العالم من الدهب، وبالتالي بيساهم في زيادة أسعاره بشكل كبير، زي ما حصل في الشهور اللي فاتت.

وبخصوص توقعات 2025، فالمشهد الحالي المتعلق بتصاعد التوترات التجارية بعد فرض أمريكا تعريفات جمركية جديدة، وكمان قرار الفيدرالي الأمريكي بتثبيت أسعار الفائدة، هيدفع المستثمرين للبحث عن الدهب كاستثمار بديل، وده هيعزز منه وهيقلل المعروض وكمان هيرفع أسعاره.

عشان كده، متوقع ارتفاع أسعار الدهب في 2025 عشان تسجل الأونصة 3000 دولار، وفي مصر ممكن جرام 21 يوصل أكتر من 4 آلاف جنيه.