تصدق أن سعر الدولار المفروض يكون 23 جنيه دلوقتي في السوق والبنوك.. وعلى فكرة دا سعره العادل والطبيعي.. تعالوا نشوف إيه القصة وايه اللي قاله مؤشر عالمي من ساعات عن العملة المصرية.. خليكم معانا للآخر.

 
تابعنا في الفترة الأخيرة تحسن المؤشرات الاقتصادية في مصر وزيادة التدفقات الدولارية وصدور عدد كبير من التقارير الدولية اللي بتبشر بقرب انخفاض سعر الدولار وعودة الجنيه المصري ومنها مؤسسات عريقة وعالمية زي جولدمان ساكس ومورجان ستانلي وصندوق النقد الدولي والبنك الدولي وغيره وقالوا إن الوفرة الدولارية الحالية والجاية هتنزل بسعر الدولار مقابل الجنيه لمستوى 50 جنيه وأمكن أقل من كده.

وفي وسط التوقعات العالمية والمحلية لسعر الدولار في مصر فجر مؤشر بيج ماك مفاجأة من العيار الثقيل لما قال إن شعر الدولار العادل في مصر 23.32 جنيه.. ايوا زي ما حضرتك سمعت كده سعر الدولار المفروض يكون في السوق والبنوك دلوقتي بـ23 جنيه.. طيب ازاي وايه هو مؤشر بيج ماك دا؟.

شوف حضرتك ببساطة كده مؤشر بيج ماك دا أطلقته مجلة ايكونوميست الاقتصادية الشهيرة والعريقة في العالم في سنة 1986لقياس أداء العملات ومهمته مقارنة المؤشر أسعار هامبورج بيج ماك لتحديد قيمة العملات في العالم والمجلة العالمية أطلقت المؤشر دا لأنه شافت أن فيه عملات كتير في العالم مظلومة ومقدرة بأقل بكتير من قيمتها الحقيقية ودا بيخسر الدولة صاحبة العملة ملايين ومليارات الدولارات كل سنة.

وقال مؤشر ايكونوميست إن كلفة البيج ماك في مصر 135 جنيه في نفس الوقت سعره في الولايات المتحدة الأمريكية 5.23 دولار وحسب المؤشر السعر العادل للجنيه مقابل الدولار هو 23.32 جنيه بدل من سعره الحالي 50.18 جنيه.

ومش بس كده د مؤشر بيج ماك كشف إن أغلب العملات العربية مقدرة بأقل من سعرها الحقيقي عن القيمة الحقيقية للعملات العربية مقابل الدولار مطلع 2025، وقال في تقريره الأخير، أن العملات العربية تم تقييمها بقيم أقل من قيمتها الحقيقية أمام الدولار الأمريكي.

طيب ايه سر وجبة بيج ماك في تحديد قيمة العملات ؟
شو ف ياسيدي مؤشر بيج ماك زي ما قلنا هو رصد أو مسح أو بحث  سنوي أنشأته مجلة الإيكونوميست البريطانية في سنة 1986 لقياس تعادل القوة الشرائية (PPP) بين الدول ودا باستخدام سعر ماكدونالدز بيج ماك كمعيار في تعادل القوة الشرائية، وهي نظرية اقتصادية تنص على إن أسعار الصرف مع مرور الوقت لازم تتحرك نحو المساواة يعني كل عملة لازم تتقيم بقوتها العادلة ولما حصل تفاوت كبير في العملات الدولية بقت قيمة وجبة ماكدونالدز بالدولار هو اللي بيحدد سعر باقي العملات في العالم زي ما ضربنا مثال بقيمة الجنيه العادلة واللي بتوازي 23 جنيه للدولار الواحد بناء على المؤشر دا اللي بيقيس القوى الشرائية لتحديد سعر أي عملة.

طيب ليه الدولار ب50.20 جنيه دلوقتي مش ب23 جنيه؟
عشان في ظروف تانية كتير بتأثر في تحديد سعر الدولار في السوق المصري أولها العرض والطلب والضغوط على الرصيد الدولاري من ديون واقساط واستيراد والتزامات وفي نفس الوقت زيادة المعروض من الدولار بينزل طبيعي بسعره في سوق الصرف يعني ببساطة فيه معادلة تانية بتحكم سعر الدولار في مصر بعيد عن مؤشر بيج ماك العالمي.