إزاي سعر جرام الدهب عيار 21 عدى الـ4000 جنيه لأول مرة في تاريخ مصر؟ وإيه علاقة ده بتصريحات وقرارات الرئيس الأمريكي دونالد ترامب؟ وهل فعلاً السياسة العالمية بتأثر على سعر الدهب ؟ في التقرير ده هنجاوب على كل الأسئلة دي ونفهم مع بعض إيه اللي بيحصل في سوق الذهب.

في الفترة الأخيرة شفنا ارتفاع غير مسبوق في أسعار الدهب في مصر.. وده خلا كتير من الناس يتساءلوا عن الأسباب الحقيقية ورا الزيادة دي.. الدهب عيار 21 اللي هو الأكثر شيوعًا في مصر وصل لمستويات تخطت الـ4000 جنيه للجرام.

طب إيه اللي حصل؟

أول حاجة لازم نعرفها إن سعر الدهب بيتأثر بعوامل كتير.. منها المحلية والعالمية.. على المستوى العالمي سعر أونصة الدهب ارتفع بشكل ملحوظ ووصل لمستويات تاريخية جديدة.. وده نتيجة لتوترات سياسية واقتصادية في العالم.. زي الخلافات بين أمريكا والصين والرسوم الجمركية المفروضة على كندا والمكسيك والصين بالإضافة لحرب روسيا وأوكرانيا، مما خلق حالة من عدم الاستقرار العالمي.

بالإضافة لكده.. تصريحات الرئيس الأمريكي دونالد ترامب الأخيرة كان ليها تأثير كبير على الأسواق العالمية.. ترامب دعا لخفض فوري لأسعار الفايدة، وده أدى لانخفاض قيمة الدولار الأمريكي وخلّى الدهب أكثر جاذبية للمستثمرين الأجانب.. ده بالاضافة كمان لتصريحاته الأخيرة عن غزة وتلميحه بسيطرة أمريكا على القطاع.

التصريحات دي زادت من قلق المستثمرين في الأسواق العالمية.. وخلتهم يلجأوا للدهب كملاذ آمن لحماية استثماراتهم.. وده زود الطلب على الدهب ورفع سعره عالميا.

نيجي بقى للسوق المحلي في مصر.. سعر الدهب في مصر بيتأثر بسعره العالمي وكمان بسعر صرف الدولار مقابل الجنيه..و مع ارتفاع سعر الدهب عالميا وزيادة سعر الدولار.. ده بيأثر بشكل مباشر على سعر الدهب في مصر.

وحاليا  سعر جرام الدهب عيار 21 في مصر تخطى الـ4000 جنيه لأول مرة.. نتيجة للارتفاعات المستمرة في الأسعار العالمية بالإضافة لتوقعات بزيادة الطلب على الدهب كملاذ آمن في ظل التوترات العالمية.

في النهاية.. لازم نفهم إن سوق الدهب بيتأثر بعوامل كتير منها التوترات السياسية العالمية زي تصريحات وتهديدات القادة العالميين وكمان العوامل الاقتصادية زي سعر الدولار والتضخم.. عشان كده مهم نتابع الأخبار العالمية والمحلية عشان نفهم إيه اللي بيأثر على أسعار الدهب وناخد قراراتنا بناءً على المعلومات دي.