أيام قليلة وهندخل علي شهر رمضان والسياحة بتكون في الشهر ده غير خصوصا السياحة العربية.. ياتري اية سر اهتمام مصر بالسائحين من دول الخليج العربي.. ومستهدفة مستهدفة تحقق كام سائح السنة دي.
شهر رمضان واحد من الشهور اللي بيكون مليان بالروحانيات واللي بتميزه عن كل شهور السنة، والمصريين لهم عادات وتقاليد بتميز شهر رمضان عن اي دولة في العالم، علشان كده في عدد كبير من السائحين من مختلف دول العالم بيكونوا حريصين أنهم يكون وقت زيارتهم لمصر لازم يكون في شهر رمضان، علشان يستمتعوا بالروحانيات وليالي الافطار والسحور الخيام الرمضانية، والحاجات الجميلة اللي بتكون موجودة في الشوارع المصرية.
طيب ازاي وزارة السياحة والأثار بتستعد لاستقبال شهر رمضان، والترويج بيكون شكله اية؟.
الحكومة المصرية ممثلة في وزارة السياحة والأثار بتستعد لشهر رمضان بدري جدا، وبتكون مجهزة مواد دعائية وترويجية مخصصة للسوق العربي وخصوصا دول مجلس التعاون الخليجي، وده بسبب أن السائح الخليجي بيكون عنده حرص شديد انه يقضي الليالي الرمضانية في مصر، وبيجي يحضر ليالي الأفطار والسحور في الفنادق واللي اغلبها بيكون مجهز خيام رمضانية وسهرات خاصة للسائحين والنزلاء في شهر رمضان، وبيكون في عروص فنية واستعراضية بسيطة للشهر الكريم.
وقبل ما بيخلص شهر رمضان، بتكون الدولة برضوا مجهزة حملات للترويج السياحي لمصر خلال اجازة عيد الفطر، خصوصا أن مصر بيكون عليها اقبال سياحي كبير جدا من السائحين وخصوصا من دول مجلس التعاون الخليجي، واللي بيجي يقضوا اجازات عيد الفطر، وبتكون الفنادق مجهزة في الفترات دي عروض خاصة وفقرات استعراضية مميزة لاستقطاب اكبر عدد من السائحين سواء كانت سياحة داخلية أو سياحة خارجية.
طيب اشمعني وزارة السياحة والاثار بتجهز حملات ترويجية خاصة للسوق العربي وخصوصا دول مجلس التعاون الخليجي ؟.
السوق العربي بشكل عام ودول مجلس التعاون الخليجي بشكل خاص لهم مكانة مميزة في مصر خصوصا فيما يتعلق بالسياحة، وده بسبب ان السائح الخليجي معروف أنه سائح عالي الأنفاق وبيصرف كتير جدا حتي لو عددهم قليل، ولكنه فئة بتحب تصرف كتر، وده نوع من السياحة مصر بتدور عليه حاليا، زي ما بتدور علي الدول اللي لها اعداد سياحة بتخرج منها باعداد كبيرة زي السوق الروسي، خصوصا أن مصر بتعمل توازن بين سياحة الاعداد وسياحة الأنفاق، وزي ما مصر عايزة تحقق رقم في تعداد السياحة الوافدة من الخارج ، برضوا عايزة تحقق رقم في اجمالي الإيرادات اللي الدولة هتحققها من القطاع.
كل التحركات اللي بتقوم بها الحكومة حاليا سواء كانت في الترويج السياحي وحملات التنشيط والافتتاحات الاثرية الجديدة وعلي راسها افتتاح المتحف المصري الكبير هدفها الوصول الي الهدف الرئيسي وهو تحقيق 18 مليون سائح بنهاية 2025 وتحقيق أكثر من 18 مليار دولار كايرادات من القطاع للدولة المصرية.
0 تعليق