هي أسعار العقارات في مصر هترفع تاني ولا هتنزل، وهل الطرح الجديد لوزارة الإسكان بإجمالي أكتر من 70 ألف وحدة سكنية جديدة، ممكن يأثر على الأسعار والسوق رايح فين الفترة الجاية؟

كلنا عارفين، إن دلوقتي، وزارة الإسكان، بتستعد لطرح وحدات سكنية جديدة لمحدودي ومتوسطي الدخل، ضمن المبادرة الرئاسية "سكن لكل المصريين 5".

والوحدات أو الشقق الجديدة هتكون بمساحات بتتراوح بين 75 و90 متر مربع، بإجمالي حوالي 78 ألف وحدة، بعضها تم الانتهاء منه بالفعل، والباقي لسه تحت الإنشاء.

عشان كده، إعلان وزارة الإسكان عن الطرح الجديد، أثار تساؤل بين الناس، هل أسعار العقارات هتغلى تاني، وإيه علاقتها بالطرح الجديد لوزارة الإسكان؟

أغلب الخبراء في القطاع العقاري، أكدوا إن هيحصل تراجع في أسعار العقارات خلأل الفترة الجاية، بسبب طرح وزارة الإسكان 78 ألف وحدة سكنية، ومتوقع الانخفاض يتراوح ما بين في 10-15% من قيمة الوحدة أو الشقة.

كمان، الطرح الحكومي ده بيتزامن مع العودة للعمل بقانون البناء الموحد رقم 119 لسنة 2008، واللي ساهم في عودة شركات المقاولات الصغيرة للعمل من جديد في السوق العقاري، وانخفاض أسعار مواد البناء، وكل دي عوامل بتساعد بشكل كبير على استقرار أسعار العقارات خلال الفترة الجاية تراجعها كمان.

ونقدر نقول، إن الطرح الجديد بيمثل حوالي 18% من احتياج السوق العقاري المصري السنوي، لأن السوق بيتطلب حوالي 500 ألف وحدة سنويًا، فبالتأكيد الطرح ده هيساهم في تراجع أسعار العقارات بنسبة توصل للربع، ومتوقع يستمر التراجع لحذ نهاية عام 2025.

كل ده، بيساهم في حدوث حالة من الرواج في حجز وشراء الوحدات السكنية، وممكن جدا يدفع  شركات التطوير العقاري لمراجعة أسعارها عشان تقدر تجذب الزبون من تاني.

فلو حضرتك ناوي تشتري عقار جديد، فاتقل لأن التخفيض جاي جاي.