ناس كتير استنت امبارح الرئيس السيسي يعلن عن زيادة المرتبات والمعاشات وحزمة اجتماعية جديدة خاصة بعد انتشار وتداول اخبار بكده على السوشيال ميديا.. ليه الرئيس ماأعلنش على الزيادة الجديدة وهل فعلا كان فيه زيادة من الأول وايه الأسباب اللي منعت الحكومة أنها تاخد القرار.. كل ده وتفاصيل تانية هنعرفها في الفيديو ده خليكم معانا للآخر

في الأول لازم نعرف إن مكنش فيه اي تصريح رسمي بيقول إن الرئيس السيسي هيعلن عن زيادة جديدة في المرتبات والمعاشات وتكافل وكرامة وإن كل اللي اتقال كان من السوشيال ميديا ومواقع التواصل الاجتماعي لكن دا ما يمنعش إن فيه تفكير في إصدار حزمة حماية اجتماعية جديدة في الوقت المناسب.. تاني حاجة لازم نعرفها أن الدولة عندها موازنة عامة وكل بنودها متسكنة بناء على موارد الدولة المختلفة واي زيادة جديدة لازم يكون معمول حسابها من موارد الدولة لأنها هتبقى ثابتة وهتتصرف كل شهر فكان لازم الحكومة تدبر موارد الزيادة الجديدة وتحطها في الموازنات اللي جاية.

تالت حاجة لازم ناخد بالنا منها الظروف الاقتصادية الحالية والظروف اللي حولينا في المنطقة واللي مصر اتأثرت بيها بشكل كبير جدا ولسه الظروف دي موجوده وبتزيد للاسوأ كمان والأولوية للحفاظ على الوضع الاقتصادي في حدود الأمان وعدم تحميل الموازنة فوق طاقتها على الأقل في الوقت المناسب لغاية الدولة ما تستعيد كل مواردها المالية وشفنا اللي حصل في قناة السويس ونزيف الخسائر الكبير ودا غير أن فيه تخوف من كتير من المستثمرين من الدخول في استثمارات جديدة بسبب حالة التوتر في المنطقة.

وبالارقام مخصصات الأجور في الموازنة 2024 /2025 ارتفع إلى 575 مليار جنيه (12 مليار دولار) لاستيعاب الحزمة الأخيرة ورفع الحد الأدنى للأجور بنسبة 50% ليصل إلى 6 آلاف جنيه (125 دولارا) شهريًا وكفاية نعرف إن مخصصات برنامج تكافل وكرامة وصلت 40 مليار جنيه  وحسب وزير المالية السابق الدكتور محمد معيط تم تخصيص 635.9 مليار جنيه للدعم والمنح والمزايا الاجتماعية في موازنة 2024/2025 مقارنة بـ 532.8 مليار جنيه تقديرات متوقعة للعام المالى 2023/ 2024.

وبلغة الأرقام والاقتصاد ماينفعش الحكومة تعتمد زيادة جديدة في بنود الموازنة سواء للمرتبات أو المعاشات وغيرها من غير ما يكون عندها موارد وماينفعش تطبع فلوس وخلاص عشان تغطي اي بنود زيادة وطارئة في الموازنة لأن دا هيزود التضخم بشكل كبير واللي هو مرتفع أساسا  ومصر عندها مشاكل كتير بسبب اللي بيحصل حولينا في المنطقة وعاملة حساب اللي هيحصل بكرة في الأسواق العالمية وخاصة النفط والذهب والسلع واللي كل يوم بسعر وفيه توقعات أن كل حاجة سعرها ممكن يقفز في أي وقت مع مراحل الصراع الموجودة في المنطقة وعشان كده الحكومة ماشية خطوة بخطوة لغاية الأزمات دي كلها ما تعدي.

طيب يعني مفيش زيادات جاية ؟
محدش قال كده لكن هيتم الإعلان عنها في الوقت المناسب لغاية الأمور ما تستقر والصورة توضح في المنطقة اللي حولينا ونشوف برنامج صندوق النقد الدولي هيوصل لحد فين وهل فيه زيادة تاني في أسعار السلع المدعمة ولا لأ وهنشوف اللي هيحصل في الأسواق الدولية وملفات الاستثمار وقناة السويس والتصنيفات الائتمانية وبعدها يتم الإعلان عن حزمة حماية اجتماعية جديدة لما مصر تدخل منطقة الامان الاقتصادي.