علق الإعلامي تامر أمين على غضب الجماهير تجاه الفنان أحمد حلمي بعد أن اعتبره الجمهور يقلل من شأن المصريين بعد أن حاول المزاح مع أحد الحضور عقب المسرحية التي يقدمها في السعودية.

وقال أمين خلال برنامج "آخر النهار" المذاع على قناة "النهار": "أنا بحبه جدا والحقيقة أنا من المعجبين، وهو فنان من الممثليين الكوميديانات القلائل اللي مبيختلفش عليهم كتير من الناس ومجمعين أنه فنان كوميدي ومحترم ومشواره ممتاز بالإضافة لعلاقته مع زوجته وناس كتير بتقول إنه أفضل كابل فني وأنا بتكلم عن الفنان أحمد حلمي".

وتابع: "أحمد حلمي مشواره احترام وفن ورقي، وهو كان تريند هذا الأسبوع، كان بيعمل مسرحية في السعودية وبرة النص كان بيهزر مع الجمهور، وبيسأل واحد قاعد في الصف الأول بيقوله أنت جنسيتك ايه قاله أنا مصري، قاله ايه ده مصري وقاعد في الصف الأول أنت اكيد معزوم".

وأوضح: "الفيديو ده اثار حفيظة كثير من المصريين وحسوا أنه فيه إهانة لكثير من المصريين وانتشرت تعليقات كثير بتقول لأحمد أحنا زعلانيين منك ولا يصح أنك تقول كده وأنا شوفت الفيديو واعتبرته إيفيه مش لطيف أوي وعدت".

وأكمل: "لما حصلت الهوجة على السوشيال ميديا أحمد حلمي رد وفي الأول عامل صورة كده معناها أنا مش شايفكم ومش سامعكم وبعدين نزل بوست كامل بيشرح فيه القصة وقال على فكرة الاتنين المصريين دول مش جمهور عادي دا أنا عارفهم ودي المطربة كارمن سليمان وزوجها الملحن المعروف وأنا اللي داعيهم وأن الكلام متاخد في سكة مش عارف ايه".

وذكر: "البوست اللي كاتبه أحمد مفيهوش طبطبة على اللي زعل وأنا هنا عندي رسالة واحدة أنا رسالتي لاحمد هو فيها إيه لو قلنا للناس مكانش قصدي؟ حقكم عليا حاولت اهزر بس ممشيتش، والإيفيه غير موقف ولا حاجة فيها ايه لو حصل كده؟ هتكبر أوي في نفوس وعيون الناس وحتى اللي زعل منك هيقولك ولا يهمك".

واختتم: "أنا من أنصار دايما أنه أيا كانت نيتي بس طالما في حد زعل مني أطبطب وأقوله متزعلش حقك على راسي وكنت اعتقد أن أحمد كده خصوصا أنه من أكثر الحريصين على جمهوره ومحبيه وأنه يحافظ على العلاقة الرائعة بينه وبينهم".