هو ايه اللي بيحصل في مصر اليومين دول.. وايه قصة المدينة الصناعية الضخمة الجديدة اللي بتتعمل في منطقة قناة السويس وايه قصة ال12 مليار دولار اللي دخلت المنطقة.
الصناعة هي الملف الأهم على مكتب الحكومة دلوقتي وقبل كده ودا بعد اتجاه الدولة للتصنيع الشامل للمنتجات والبضائع والتحول للتصدير بدل الاستيراد.. والحقيقة دلوقتي فيه ثورة صناعية حقيقية بتحصل في مصر من خلال مناطق صناعية جديدة ضخمة في كل الصناعات ومن خلال زيادة عدد المصانع الموجودة وزيادة المكون المحلي في الصناعات ودا غير توطين التكنولوجيا الصناعية وتطبيق احدث المعايير..
مصر اخترعت المناطق الصناعية المتخصصة لتجذب مزيد من الاستثمارات في القطاع الحيوي دا وكان منها المنطقة الاقتصادية لقناه السويس واللي بتعتبر كنز مصر الصناعي القادم وسنغافورة جديدة على أرض مصرية لأن اللي بيحصل فيها بيفوق التصور وحجم الخطط الموجودة وبتتنفذ بيقول إن مصر هتكون مركز صناعي ضخم في المنطقة والعالم ودا بفضل الموقع الاستراتيجي لمصر واللي بتخدمه شبكة حديثة ومتطورة من المواني واللوجستيات ودي بتدي ميزة للمناطق الصناعية المصرية.
فيه كتير مننا مايعرفوش حجم المنطقة الاقتصادية لقناة السويس الحقيقي وكفاية تعرف إن المنطقة دي داخلها مدن صناعية تانية زي تيدا الصينية وزي المنطقة الصناعية اللي بتطورها مجموعة أوراسكوم للمناطق الصناعية واللي بتعتبر جزء من المخطط الطموح للمنطقة الاقتصادية لقناة السويس، واللي بتهدف لجعل مصر مركز إقليمي للصناعة والتجارة وكمان الاستثمارات الضخمة دي بتعكس ثقة المستثمرين المحليين والأجانب في السوق المصري وخلق فرص عمل جديدة وتعزيز نمو الصناعات التحويلية، وزيادة الصادرات.
والجديد إن شركة أوراسكوم للمناطق الصناعية كشفت عن أرقام ضخمة زي أنها حققت استثمارات صناعية ضخمة وصلت 12 مليار دولار في منطقتها الصناعية الأولى بالعين السخنة والرقم طبعا ضخم جديد وبيدل عن اللي بيحصل في المطقة دي وحجم العمل وكفاية نعرف أن مدينة اوراسكوم بتمتد على مساحة 10 مليون متر مربع.
الشركة كشفت كمان إنها هتصخ استثمارات جديدة بقيمة 7 مليار جنيه خلال السنين الجاية وتنمية المنطقة الصناعية الجديدة اللي حصلت عليها في العين السخنة الاستثمارات تهدف إلى إنشاء مجمعات صناعية متكاملة، توفر بيئة مناسبة لجذب المزيد من المستثمرين وتعزيز فرص النمو الاقتصادي.
منطقة اورسكوم بتعتبر منطقة صناعية متكاملة بمواصفات عالمية وبتضم مجموعة متنوعة من المصانع في كافة القطاعات الاستراتيجية زي قطاع الصناعات الثقيلة والمعادن ومصنع حديد المصريين لإنتاج الحديد والصلب ومصنع “حيات” التركي لإنتاج مستلزمات المستشفيات والمنتجات الصحية ومصانع أدوية “اتكو” المتخصص في إنتاج المستحضرات الدوائية ودا غير شركات ومصانع قطاع مواد البناء والتشييد و الصناعات التكنولوجية والبنية التحتية... ودلوقتي شركة أوراسكوم بتخطط لتوسيع نطاق مشاريعها في العين السخنة من خلال تطوير منطقة صناعية جديدة على مساحة 3.3 مليون متر مربع هتركز على الصناعات الصديقة للبيئة والمستدامة.
0 تعليق