يا ترى ليه قطاعات الصناعة المصرية بقت جاذبة للمستثمرين الأجانب في الفترة الأخيرة، هل في محفزات امتيازات بتتقدم لهم، ولا ده اجتهاد شخصي من الفريق كامل الوزير، طب إيه هي أبرز الصناعات اللي بتجذب رؤوس الأموال دلوقتي.
 

طبعا قطاع الصناعة بقى من أكتر القطاعات الجاذبة للمستثمرين دلوقتي، وأكبر وآخر دليل على كده هو إقبال الشركات المجرية على تقديم طلبات استثمار في مصر.

والطلبات دي استقبلها الفريق كامل الوزير، نائب رئيس مجلس الوزراء للتنمية الصناعية، وزير الصناعة والنقل، في لقائه مع بيتر سيارتو وزير الخارجية والتجارة المجري، فبعد نا بحث تعزيز التعاون المشترك بين البلدين في مجال الصناعة والنقل، استقبل رؤساء عدد من الشركات اللي عايزة تستثمر في مصر.

ومن هنا، رحب الفريق كامل الوزير بزيادة حجم التعاون المشترك مع الجانب المجري في كل المجالات، ومنها مجالي الصناعة والنقل، لأن التعاون ده بيخدم المصالح المشتركة للشعبين الصديقين.

كمان، "الوزير" بحث مع وزير الخارجية والتجارة المجري الموقف التنفيذي لعدد من المشروعات الحالية والمشروعات المستقبلية اللي هتتنفذ في مصر قريب، وهتكون نقطة انطلاقة وتعاون كبير بين مصر والمجر في مجالي الصناعة والنقل.

ومن بين الشراكات الاقتصادية بين مصر والمجر، هي إن شركة" ترانسماش" المجرية صنعت صفقة 1350 عربة سكة جديدة للركاب ووردتها لمصر، وحاليا بيتم استكمال توريدها من خلال شركة "جانز مافاج" المجرية، ولحد دلوقتي وصل عدد اللي تم توريده من العربات 1016 عربة (بواقع 500 درجة ثالثة تهوية ديناميكية - 460 درجة ثالثة مكيفة - 34 عربة ثالثة بوفيه مكيفة- 4 درجة أولى مكيفة - 18 درجة ثانية مكيفة).

وبرضو تم التأكيد على التزام الشركة المجرية بتصنيع وتوريد العربات المتبقية بأعلى درجة من الجودة والفخامة، خاصة عربات الدرجة الأولى، وده عشان نقدم أعلى مستويات الخدمة لجمهور الركاب، خاصةً وأن الصفقة دي هي الأكبر في تاريخ سكك حديد مصر، وكمان بتجسد التطور الكبير اللي أصبحت عليه الوحدات المتحركة "العربات" بمنظومة السكك الحديدية.

والكلام ده بيؤكد إن مصر منفتحة على التعاون مع كل دول العالم في مجال الصناعة، ومنها دولة المجر الصديقة، خاصة مع تنفيذ وزارة الصناعة لخطة شاملة للنهوض بالصناعة المصرية تنفيذاً لتوجيهات الرئيس عبد الفتاح السيسي رئيس الجمهورية بتحويل مصر إلى مركز صناعي إقليمي.

ونقدر نقول إن مصر جاهزة تاني للتعاون مع الشركات المجرية لإقامة مصانع جديدة في مصر، خاصة في الصناعات المستهدفة اللي حددتها وزارة الصناعة، واللي بتضم حوالي 23 صناعة واعدة، عشان تساهم في تلبية احتياجات السوق المحلي، والتصدير للخارج، خاصة وأن السوق المصري سوق واعد، بتتوافر به مقومات التصنيع المختلفة، زي مجال الطاقة الجديدة والمتجددة زي طاقة الرياح والطاقة الشمسية، والمصاعد والسلالم المتحركة وصناعة السيارات ومكوناتها وبطاريات وإطارات السيارات وبطاريات تخزين الطاقة والبوليستر وطلمبات رفع المياه.

كمان، هيتم توطين الصناعات دي في مصر من خلال الاعتماد على الخبرات الكبيرة للشركات المجرية في الصناعات دي، وقريب جدا هنشوف كل ده بعنينا.