أوضح لإعلامي مصطفى بكري موقف الرئيس عبد الفتاح السيسي من تهجير الفلسطينيين واضح، مشيرا إلى أنه لن يتراجع عنه مهما كانت الضغوط.
وقال بكري خلال برنامج "حقائق وأسرار" المذاع على قناة "صدى البلد": "سيناء أرض مصرية خالصة ولن تكون بديلا للفلسطينيين وأن توطين الفلسطينيين في سيناء قد يؤدي لتأثيرات أمنية خطيرة تهدد استقرار المنطقة كلها ودا كلام الرئيس".
وأضاف: "كل ما يحدث الآن محاولة هدفها ممارسة الضغط على المصريين، المصريين يا سيد ترامب واقفين خلف رئيسهم وإحنا على ثقة أن القائد الذي لم يخذلنا في ثورة 30 يونيو لن يخذلنا أيضا في الحفاظ على أمن بلدنا ورفض التهجير".
وتابع: "عبد الفتاح السيسي دا دماغه صلبة وتراب الوطن عنده مقدس ورجل عنيد وحاسم ومحدش هيقدر يغيره ولا يزحزحه من موقفه، إحنا كلنا على ثقة أنه حتى لو الرئيس قرر يسافر أمريكا ويقابل ترامب هيقوله نفس الكلام".
وواصل: "عندنا رئيس بيتكلم بلغة واحدة ولسان واحد واللي بيقوله في السر هو اللي بيقوله في العلن وعشان كده بقول للناس كلها حتى لو الرئيس السيسي سافر هيطلع زي الأسد يقول نفس الكلام".
وأوضح: "فاكرين لما وزير الخارجية الأمريكي جه هناك بعد عملية طوفان الأقصى الرئيس تعمد يخلي الكلام علني وينقل على الهواء وكان كلامه واضح مصر مش هتفرط، ومش هتقبل بالتهجير ومش هتسيب حق الشعب الفلسطيني في إقامة دولته المستقلة وعاصمتها القدس الشرقية ومسؤوليتنا كعرب ومصريين هوة دا".
وأكمل: "اللي بيقولك أن الرئيس اعتذر عن زيارة أمريكا وهناك من يقول إن الموقف لم يحسم بعد واحتمال الرئيس يسافر، يروح أسبانيا أولا ويقابل المسؤولين هناك وبعدها يروح أمريكا ويقابل ترامب".
وذكر: "ثقوا لكل من يعرفون الرئيس السيسي لا الرئيس بيتهز ولا بيتهدد ولكن الرئيس دايما بيتعامل بالسياسة والحكمة والذكاء ولكن الثوابت خط أحمر".
واختتم: "الرئيس دايما بيقولكم يا شعب مصر العظيم وفاكرين لما قالكم لو العالم كله هيحاربنا وجبهتي الداخلية موحدة مش هيهمني وفاكرين لما طالبكم بالوحدة ووحدتنا هي الخلاص والقوة".
0 تعليق