هو ليه مصر بتعمل شراكات إستراتيجية مع دول كتير وخاصة في ملف الاقتصاد والتجارة وليه الدولة حريصة على توسيع التعاون مع دول بعينها في العالم وايه علاقة دا بالأمن القومي المصري.

لو ملاحظين في الفترة الأخيرة مصر وقعت شراكات إستراتيجية واقتصادية ورفعت مستوى العلاقات التجارية مع دول كتير من الصين للهند والخليج وصولا لأوروبا واخرها نيجيريا وكرواتيا ورغم إن مصر علاقتها كويسة باغلب دول العالم لكن كان ليها هدف بعيد المدى من توسيع دايرة الشراكة الاقتصادية مع كتير من دول العالم وهو تجنب أي ضغوط اقتصادية من اي نوع يعني ببساطة مصر ماحطتش اقتصادها كله في سلة واحدة زي ما بيقولوا وعشان كمان تضمن النمو الاقتصادي المستدام من خلال الشراكات مع اقتصاديات ضخمة وكده مصر بتتخلص من اي سيناريو اقتصادي خطير وهتخلق لنفسها مجال للمناورة وقت اللزوم.

كمان من خلال الشراكات الاقتصادية الجديدة مصر ضمنت أسواق جديدة ودائمة لمنتجاتها وزيادة التصدير وكمان زيادة تأثيرها في التجارة الدولية وغير كمان ضمان تدفق استثمارات جديدة مع ترفيع العلاقات مع دول كتير ودا اللي شفناه في الفترة الأخيرة مع زيادة التدفقات النقدية الأجنبية في ملف الاستثمارات الخارجية وكمان الشراكات دي بتضمن تبادل الخبرات الفنية بين مصر ودول العالم والاستفادة من تجاربها الناجحة ودا شيء مهم جدا على الصعيد الاقتصادي.

والاهم في ملف الشراكات الاقتصادية والإستراتيجية مع دول العالم هو زيادة تأمين مسارات الأمن القومي المصري في الجانب الاقتصادي لأنه لما يكون عندك علاقات اقتصادية مميزة مع دول كتير مفيش تهديدات اقتصادية ممكن تأثر في الدولة المصرية ولا حتى في قرارها السيادي ودا غير أن مصر تقدر تعرض الفرص الاستثمارية في السوق المصري بسهولة ويكون ليها الأولوية عن غيرها من الدول بحسب الاتفاقيات الاقتصادية لأن كمان مفيش دولة بتعيش لوحدها دلوقتي وبقت الكيانات الاقتصادية هي اللي بتقول النمو والتعاون وتوجه الاستثمارات وعشان كده مصر انضمت لتجمع البريكس.

ولو عددنا فايدة الشراكات الاقتصادية بين مصر ودول العالم هنلاقيها مش بس بتخدم الاقتصاد المصري لكن كمان بتعزز العلاقات السياسية مع الدول دي وبيمتد التعاون في مجالات تانية بعيد عن الاقتصاد زي الصناعات الدفاعية والتعاون في القضايا الدولية وتوحيد المواقف الدولية يعني الاتفاقيات دي باختصار بتخدم على الدولة المصرية بشكل عام ودا سبب إن مصر بتتوسع كل يوم في توقيع اتفاقيات تعاون وشراكة مع الدول المؤثرة اقتصاديا في العالم.

طيب امتى هنشوف تأثير الشراكات الاقتصادية في الأسواق المصرية ؟
عشان نبقى عارفين مصر بتجني فعلا نتيجة الشراكات دي دلوقتي والاستثمارات اللي جت او اللي لسه هتيجي في قطاع الاقتصاد والتجارة كلها جاية من الاتفاقيات دي وهنشوف تأثير دا الفترة الجاية مع زيادة الصادرات المصرية والنفاذ لأسواق جديدة وفي زيادة الاستثمارات الأجنبية في السوق المصري وشفنا النهاردة تصريحات رئيس وزراء كرواتيا واللي بيتكلم عن الشراكة مع مصر وتدشين خطوط نقل بحرية سريعة لاستقبال الصادرات المصرية زي ما حصل في خط الرورو مع ايطاليا قبل كده.