استغاث عدد من المواطنين من شركة معمار المنصور ، ونظموا وقفة احتجاجية ضد الشركة بسبب تأخر تسليم وحداتهم.

وقال واحد من المتضررين" شركة كدابة و نصابة ومعندهاش مصداقية ف اي حاجة ، تأخير جداا بقالنا ٤ سنين بنقسط و تسليمنا كان ف ٢٠٢٣ و اخد كمان دفعة الصيانه قبل ما يسلمنا بحجة معهوش سيولة و مفيش استلام حتي الآن و كمان بيبلطجوا علينا".

كما حرر الملاك محضر ضد شركة معمار المنصور للتطوير العقاري ، بعد تأخر تسليمهم وحداتهم السكنية أكثر من مرة ، على حد قولهم.

وقال الملاك فى وقفة احتجاجية أمام مقر الشركة،" تحذير لكل الناس: لا تثقوا في معمار المنصور! إحنا ملاك وحدات كمبوند ترو – مدينة نصر، دفعنا كل اللي ورانا واشترينا شُققنا بحلم إننا نسكن فيها في مارس 2023 تسليم مبدئي، وسبتمبر 2023 تسليم نهائي، لكن النهاردة إحنا في 2025 وماحدش استلم حاجة! الشركة فضلت تماطل فينا بوعود كدابة واجتماعات مالهاش أي فايدة".

وتابعوا فى وقفتهم الاحتجاجية ضد شركة معمار المنصور،" النهاردة قررنا نروح نسأل عن حقنا بشكل محترم وسلمي، لقينا أبواب الشركة مقفولة في وشنا!، منعونا حتى من الدخول، كأننا بنتسول منهم! الشركة اللي زمان استقبلتنا بالضيافة وقت ما كنا بندفع الفلوس، دلوقتي قررت إن مكانا الشارع!".

وتابعوا،" واضح إن معمار المنصور بتلعب معانا لعبة النفس الطويل، عايزين يزهقونا عشان كل واحد فينا يبيع شقته بنفس السعر اللي اشتراها بيه، وهما يرجعوا يبيعوها بضعف التمن، بعد ما سعر المتر زاد بشكل كبير بسبب المونوريل وتطور المنطقة.

وقالوا،" نحذر أي حد بيفكر يشتري من معمار المنصور! دي شركة لا أنصح بالثقة فيها أو التعامل معاها، لأن اللي بيحصل معانا النهاردة ممكن يحصل مع أي حد بكرة.. إحنا مش هنسيب حقنا، واتجهنا لقسم الشرطة وعملنا محضر رسمي، ولسه مكملين بكل الطرق القانونية عشان نوصل لحل. مش هنسمح إن تعبنا وفلوسنا تروح عشان شركة قررت تبيع الوهم للمواطنين!".

وتابعوا،" إحنا بنطالب كل المسؤولين، وكل حد عنده ضمير، إنه يتدخل عشان ناخد حقنا ونستلم شُققنا زي ما تم الاتفاق عليه. كفاية استهتار بحقوق الناس!".

وقال متضرر اخر،" شركة كل يوم بكلمة
مفيش تسليم.. مفيش احترام للناس اللي شاريين منهم.. تأخير تسليمات.. سحب شيكات الصيانة قبل ما الشقق تطلع اصلاً و الله اعلم عملوا بيها ايه.. لما الناس راحت ليهم جابوا ليهم الشرطة اكتر من مرة
يقولك معندناش حد يقابلكم.. وصاحبها كل مرة لمسافر لبيعمل عملية لبيعمل عمرة
حسبي الله ونعم الوكيل فيهم فرد فرد".