ايه اللي بيحصل في ملف الصناعة الوطنية وازاي مصر هترجع تصنع من تاني وشعار صنع في مصر يرجع يلف العالم وايه حكاية ال2 مصنع الجديدة اللي أعلن عنها كامل الوزير.

ملف الصناعة المصرية من أهم الملفات اللي الرئيس السيسي بيتابعها بشكل يومي وعلى رأس أولويات الدولة كلها ودا لأن الصناعة بتمثل الحل الامثل لكل مشكلات مصر الاقتصادية بدون مبالغة لأن التصنيع معناه زيادة الإنتاج وفي نفس الوقت معناه استيراد قليل وتصدير اكتر وموارد دولارية زيادة وفي نفس الوقت تقليل استنزاف العملة في عمليات الاستيراد.. ومصر نجحت في عهد كامل الوزير وزير الصناعة والنقل في عمل نقلة نوعية واضحة جدا بداية من تعديل التشريعات والروتين اللي كان بيعمل الدنيا وتسهيل عمليات الحصول على تراخيص المصانع والأراضي واستيراد المواد الخام والحكاية بقت كلها الكتروني دلوقتي بعد استخدام التكنولوجيا الرقمية في إنهاء الإجراءات.

ونجح الوزير من خلال جولات في شرق الأرض وغربها في استقطاب علامات تجارية عالمية في كل الصناعات لتوطين الصناعة في مصر ونقل وبناء مصانع ليها في مصر وشوية شوية بانت الصورة إن مصر في طريقها أنها تكون مركز إقليمي في الصناعة وبدأت اولي الثمار في القفزة اللي حصلت في قطاع التصدير ووصلنا للرقم 40 مليار دولار كبداية للوصول إلي 100 مليار دولار صادرات كمرحلة أولي يجي وراها مراحل تانية كتير للصعود بالارقام لإضعاف رقم 100 مليار دولار ومصر مش اقل من دول حولينا بتصدر باكتر من 300 مليار دولار ومعندهاش نفس الإمكانيات اللي في مصر.

الوزير نجح كمان في استغلال إمكانيات مصر الضخمة في قطاع النقل والموانئ واللوجستيات في جذب استثمارات صناعية بمليارات الدولارات في كل انواع الصناعات بداية من الهيدروجين الاخضر الي السيارات والأدوية والمواد الغذائية وغيرها من الصناعات.. كمان الوزير قدر يمشي كويس في استعادة العمل في 12 ألف مصنع متعثر ومتوقف وإعادته للإنتاج ودا غير تحويل مصانع حكومية من الخسارة إلى الأرباح الضخمة وشفنا اللي حصل في قطاع الشركات الحكوميه زي النصر للسيارات والغزل والنسيج في المحلة وغيرها من القلاع الصناعية اللي رجعت تشتغل من تاني..

الجديد في ملف الصناعة كان اللي أعلنه كامل الوزير من شوية وهو طرح 2172 قطعة أرض صناعية على مساحة 13 مليون متر مربع جاهزة المرافق في 22 محافظة على مستوى الجمهورية  من خلال منصة مصر الصناعية الرقمية وبمساحات متنوعة وبأنشطة مختلفة مما يسهم في تسريع إقامة المشروعات الصناعية وزيادة الإنتاج المحلي ويتزامن الطرح مع إعلان الوزير، عن إطلاق وزارة الصناعة للمرحلة التانية من منصة مصر الصناعية الرقمية واللي تم فيها إضافة 3 خدمات حيوية جديدة يتم التقديم عليها إلكترونيا وهي خدمات تراخيص البناء وبيان الصلاحية والسجل الصناعي..

وحسب الوزير طرح الأراضي الجديد ضمن ستراتيجية الوزارة لتسريع وتيرة الإنتاج وتعميق التصنيع المحلي وزيادة الصادرات وتلبية احتياجات الاستثمار الصناعي من الأراضي المرفقة بشكل مستدام وسرعة توفيرها بشفافية كاملة للمستثمرين الصناعيين الجادين لتلبية الطلبات المتزايدة على الأراضي الصناعية لإقامة مشروعاتهم، ودا من خلال توفير فرص استثمارية جديدة لتشجيع الاستثمار الصناعي المحلى والأجنبي عن طريق طرح الأراضي المرفقة دوريا كل 3 شهور من خلال منصة مصر الصناعية الرقمية.

وحسب المعلومات المصانع الجديدة اللي أعلن عنها الوزير هتصنع مواد غذائية ودوائية هندسية وكيماوية ومواد بناء بجانب صناعات الغزل والنسيج.. وطبعا إضافة الرقم الكبير دا من الأراضي الصناعية للمصانع هيضيف قوة كبيرة للصناعة المصرية وتوفير فرص العمل وزيادة التصدير.