مليارات الدولارات ومركز عالمي للتجارة والصناعة.. ايه اللي بيحصل في المنطقة الاقتصادية لقناه السويس وايه حكاية مشروعات القنطرة غرب وازاي هتحول مصر لغول صناعي وتجاري.

مصر زي ما احنا عارفين اتجهت في السنين الأخيرة وبعد اكتمال انشاء البنية الأساسية للتصنيع الشامل لكل المنتجات والتوسع في التصدير وعندها خطط طموحة وبمليارات الدولارات في توطين الصناعة وتقليل الاستيراد والوصول لرقم 100 مليار دولار صادرات بشكل مبدئي وبعدها انطلاقة أكبر على مراحل لغاية ما توصل لمصاف الدول الكبري في الصادرات بحوض المتوسط زي تركيا اللي بتصدر ب300 مليار دولار وألمانيا اللب بتصدر بحوالي ترليون ونص يورو.

طيب هل مصر ممكن توصل للدول دي في الصناعة والصادرات ؟
شوف حضرتك في عالم الاقتصاد والأرقام مفيش مستحيل وزي ما الدول دي وصلت مصر قادرة تحقق إنجازات كبيرة لكن الأهم في الحكاية هو التخطيط السليم والاستغلال الأمثل للامكانيات المتاحة.. ومصر عندها إمكانيات تكون اغني دولة في المنطقة والعالم وخاصة الموقع الجغرافي ودا اللي نقصده من التقرير دا.. يعني إيه؟...  يعني حضرتك موقع مصر الجغرافي الفريد دا تقدر تقول هو طاقة القدر للاقتصاد المصري لأن مصر في قلب العالم من الناحية الجغرافية وقريب من كل الأسواق وفي ملتقى خطوط التجارة العالمية وعندها موانئ على أهم بحرين في العالم وعندها قناة السويس كمان والموقع دا خلاها قبلة المستثمرين وأمام أنظار الكيانات الاقتصادية الكبرى في العالم..

ومصر في عهد الرئيس السيسي اتجهت لفكرة المناطق الصناعية الشاملة والمتخصصة وقامت بإنشاء البنية الأساسية الحديثة الخاصة بيها من طرق ومحاور ومواني ولوجستيات وكهرباء وغيرها ونقدر نقول إن المناطق دي كانت بداية الانطلاقة الصناعية لمصر  ومن بين المناطق دي المنطقة الاقتصادية لقناة السويس واللي كل بتجذب مشروعات ضخمة ووصلت فيها الاستثمارات لحاجز ال8 مليار دولار ولسه في بدايتها..

واخر المشروعات الجديدة في إقتصادية قناه السويس كان توقيع عقد المرحلة الأولى لمشروع “أروغلو التركية ” بإجمالي استثمارات بتوصل ل 120 مليون دولار والمشروع عبارة عن إقامة مصنع متكامل يشمل كافة مراحل إنتاج الملابس الجاهزة بداية من مرحلة الغزل لغاية المنتج النهائي على مساحة 100 ألف متر مربع، بمنطقة القنطرة غرب الصناعية الواعدة والمشروع هيوفر 5000 فرصة عمل و إنتاج 30 مليون قطعه سنويا.. ودا المشروع التاني لمجموعة إروغلو جلوبال القابضة التركية داخل منطقة القنطرة غرب الصناعية لانها سبق ودشنت مصنع ملابس جاهزة بردو في المنطقة الصناعية  باستثمارات 180 مليون دولار .

وبمناسبة  منطقة القنطرة غرب الصناعية فهي جزء من المنطقة الصناعية في منطقة قناة السويس الاقتصادية واللي وصلت مرحلتها الأولى إلى 12 مشروع على مساحة 1.112 مليون متر مربع بتكلفة استثمارية حوالي 511 مليون دولار هتوفر حوالي 22 ألف فرصة عمل خلال 20 شهر فقط بحسب تصريحات وليد جمال الدين  رئيس الهيئة العامة للمنطقة الاقتصادية لقناة السويس.

جمال الدين كشف كمان إنه نتيجة للجهود الترويجية الحثيثة اللي قامت بيها الهيئة منطقة القنطرة غرب بقت معقل لصناعة الملابس والمنسوجات والصناعات الغذائية ودا بسبب زي ما قلنا في الأول الموقع الاستراتيجي للمنطقة وقربها من الموانئ البحرية في بورسعيد والسخنة وكونها نقطة انطلاق مثالية للوصول إلى الأسواق الإقليمية والعالمية وقال كمان إن  تطوير البنية التحتية وتقديم التسهيلات اللازمة زي توفير الأراضي والخدمات اللوجستية والتراخيص لضمان تجربة استثمارية مرنة وفعالة هتعزز من تنافسية المنطقة الاقتصادية إقليميا وعالميا كمركز صناعي ولوجستي ملهوش مثيل في المنطقة.