معاك فلوس وعاوز تستثمرها بس خايف من النصب.. سمعت عن موضوع منصة fbc  وخايف يتضحك عليك.

لسه موضوع منصة FBC عامل قلبان على السوشيال ميديا، خاصة وإنه بيعتبر أحدث نصباية واللي وقع في شباكها ملايين الناس من مصر ودول عربية تانية.

ولكن رغم اللي حصل، إلا أن لسه استثمار الفلوس وتحقيق الأرباح منها بيظل حلم بيراود ناس كتير، وبيتحول لهدف رئيسي لهم، ومن هنا بيبحث صغار المستثمرين عن طرق أو قنوات لاستثمار فلوس عشان يقدروا يحققوا  عوايد مالية كبيرة.

ومع التطور التكنولوجي اللي حصل، أصبح استثمار الفلوس وجذب المستثمرين على المنصات الإلكترونية، أسهل ما يمكن، خاصة على المنصات المتخصصة في التداول، واللي أغلبها مش بيخصع للرقابية، فمن هنا بتمارس المنصات دي النصب والاحتيال من خلال وهم بتبيعه للناس بتحقيق عوايد مالية هائلة في وقت قصير جدًا من خلال استثمار مبالغ بسيطة جدا من فلوسهم، ومن بين هذه المنصات دي، كانت منصة FBC.

ولكن بعيدا عن المنصات غير المعروفة، هل في طرق لاستثمار فلوسك بشكل آمن؟

بص يا سيدي، في طبعا طرق استثمار آمنة جدا وقانونية وشرعية وكمان بتخضع للجهات الرقابية، واللي من أهمها هو الاستثمار في الأسهم أو في البورصة، واللي هتقدر تحقق منه عامل الأمان في عملية الاستثمار في الأسهم بدون التعرض لعمليات نصب أو احتيال، كمان السمة الرئيسية للاستثمار في الأسهم هي الربح والخسارة، وبتبقى وفقا للعرض والطلب.

كمان، عندك الاستثمار في الصناديق، ودي بتعتبر من بين أكتر طرق الاستثمار الآمنة والمعروفة، وبتضمن لك تحقيق عوائد مالية، وفي حالة لو أدرت فلوسك في صناديق الاستثمار من خلال مجموعة من المتخصصين في إدارة المحافظ الاستثمارية، هتحقق أرباح ضخمة جدا.

تالت حاجة هي صناديق الاستثمار في الدهب، وطبعا كلنا عارفين إن الدهب مابيخسرش، فهتحظ فلوسك فيه وأنت مطمن، وعشان تطمن أكتر فالصناديق دي بتخضع لرقابة صارمة جدا.

كمان عندك الاستثمار في سندات وأذون الخزانة، واللي هي أدوات دين حكومية قصيرة الأجل، بتصدر في فترة تتراوح بين 3 و12 شهور، يعني أقل من سنة، لكنها بتتميز بأنها أدوات مالية منخفضة المخاطر، يعني بيتم تداولها في أسواق المال بيع وشرا، ولما يجي تاريخ الاستحقاق بتلتزم الحكومة بدفع القيمة الاسمية المدونة على وثائق أذون الخزانة.

أما السندات، فهي كمان من بين أدوات التمويل، ولكن بتختلف آجال استحقاقها عن السندات، لأنها طويلة الأجل وبتتراوح بين سنتين لحد 20 سنة، وهي كمان بتتنوع بين سندات حكومية وسندات بتصدرها الشركات، وكلها بتخضع للرقابة.

ولو في أي نوع استثمارات من اللي قولناها مناسبة لك، أدرس الموضوع كويس وتوكل على الله.