مصر مع الوقت بقت قبلة الاستثمارات الأجنبية والمرة دي شركة كبيرة جدا قدمت عروض للدخول للسوق المصري في مجال الاكتشافات البترولية.. ياتري اية هيا الشركة دي.. ومصر هتستفاد اية من دخولها للاستثمار في السوق المصري.

علي مدار الشهور اللي فاتت، مصر قدمت تحفيزات كبيرة جدا للشركات الأجنبية ورؤوس الأموال الخارجية للدخول للسوق المصري، والتسهيلات دي خلت اغلب الشركات العالمية بتحاول تدور علي فرصة للدخول للسوق المصري في كل المجالات، وده اللي الحكومة كانت عايزة توصل خصوصا أن مصر عندها خطة أنها تكون مركز اقليمي لتبادل الطاقة والتبادل التجاري.

التسهيلات والالتزامات الدولية اللي قامت بيها الدولة المصرية علي مدار الشهور اللي فاتت خلت كل الشركات العالمية عندها ثقة في الدخول للسوق المصري، خصوصا أن الشركات حاليا متاكده أنها هتاخذ فلوسها في المواعيد المحددة ومش هيكون في اي تاخير في الالتزامات أو السداد زي ما كان بيحصل في السنين اللي فاتت، واحد من اهم القطاعات اللي عليها اقبال كبير هو قطاع البترول والتنقيب عن الغاز الطبيعي وابار البترول.

طيب اية حكاية الشركة العالمية اللي عايزة تدخل السوق المصري، واية الفايدة اللي هتعود علي مصر من دخولها؟.

شركة كايرون بتروليم العالمية ودي واحدة من أكبر الشركات اللي موجودة في العالم واللي متخصصة في مجال البحث والتنقيب عن البترول، واللي لها اعمال في مصر، اعنلت عن اعتزامها زيادة إنتاجها من الزيت الخام والغاز الطبيعي في مصر بنسبة 33% بنهاية 2025، وكمان الشركة رفعت انتاجها اليومي من 20 ألف برميل في 2020 إلى 120 ألف برميل في 2024 وحاليا الشركة عندها خطة لزيارة الرقم ده لـ160 ألف برميل يوميا بنهاية 2025.

الزيادة الجديدة اللي هتقوم بيها شركة كايروت بتروليم هتيجي بعد ما الشركة نجحت في استكشاف 3 بلوكات جديدة في مناطق امتياز الصحراء الغربية، نتيجة الشغل اللي قامت بيها لتعظيم إنتاجها من الزيت والغاز الطبيعي بالتنسيق مع هيئة البترول المصرية والشركة القابضة للغاز إيجاس.

مش كده بس، لا ده كمان الشركة بتستهدف حفر 7 آبار استكشافية في السنة الحالية منهم 6 آبار بالصحراء الغربية، ده غير عمليات التطوير اللي بتقوم بيها الشركة للآبار التنموية لرفع الإنتاج العام من الزيت والغاز وهيوصل معدل الاستثمارات الجديدة اللي هتضخها الشركة في عمليات البحث والتنقيب وحفر الآبار الجديدة لـ 300 مليون دولار على مدار 2025.

طيب اية الاسباب اللي هتخلي الشركة ترفع استثمارتها في السوق المصري؟.
السبب الرئيسي في قرار شركة كايروت بتروليم، هو التزام مصر بسداد كل الفلوس والالتزمات المالية اللي عليها لشركات التنقيب عن البترول، وكمان الرغبة اللي موجودة عند الحكومة لزيادة وتعظيم الانتاج اليومي من الغاز الطبيعي والزيت، خصوصا أن الدولة للاسف اضطرت علي مدار الشهور اللي فاتت لفتح استيراد الغاز الطبيعي والزيت من الخارج لسد النقص اللي موجود في السوق المحلي.