مصر في الوقت الحالي بقت دولة رائدة في جذب الاستثمارات ورؤس الأموال الأجنبية.. والمرة دي من قناة السويس.. فيه مجموعة شركات الصينية دخلت مصر هتغير خريطة الصادرات المصرية بشكل كامل.. ياتري اية هيا الشركات دي.. وتاثيرها اية علي الاقتصاد المصري.

الفترة الحالية الحكومة مفيش ملف بيحظي باهتمام زي ما ملف الاقتصاد، وكل الوزارات والجهات العاملة في الدولة بتحاول بكل الطرق أنها تفتح ابواب دولارية لمصر سواء من زيادة الصادرات وجذب رؤوس الاموال الأجنبية في القطاعات والشركات التابعة للوزارات المختلفة، أو تقليل الاستيراد من سلعة أو خدمة معينة الوزارة بتقدمها للمواطنين.

التوجيهات الرئاسية اللي اصدرها الرئيس السيسي للحكومة في جذب الاستثمارات الأجنبية كانت واضحة وهيا معادلة الميزان التجاري المصري وده هيحصل من خلال تقليل الاستيراد وزيادة التصدير، وده بيحصل من خلال التسهيلات الكبيرة اللي قدمتها الحكومة لجذب ودخول الشركات ورؤس الأموال الأجنبية واللي هيا عبارة عن تسهيلات في الحصول علي الاراضي وكمان تسهيلات في التراخيص اللازمة للبناء والتشغيل من خلال منح الرخصة الذهبية واللي هيا عبارة عن رخصة واحدة وكافية للبناء والتشغيل واللي بيقدمها مجلس الوزراء للمشاريع والمصانع اللي بتدخل السوق المصري، ده غير اعفاءات وتحفيضات كبيرة في الاجراءات والرسوم الجمركية علي التصدير، والتسهيلات الكبيرة اللي بتقدمها الدولة لفتح اسواق خارجية قدام الصادرات المصرية للوصول لكل دول العالم.

طيب اية حكاية الاستثمارات الصينية الجديدة اللي دخلت السوق المصري؟

من كام ساعة، وليد جمال الدين، رئيس الهيئة العامة للمنطقة الاقتصادية لقناة السويس وقع عقدين لمشروعين جديدين بمنطقة القنطرة غرب الصناعية، بإجمالي استثمارات وصلت لـ28 مليون دولار في مجالات صناعة وطباعة وصباغة المنسوجات واللي هتكون على مساحة 100 ألف متر مربع وهتوفر 800 فرصة عمل مباشر مع واحدة من كبري الشركات الصينية .

مشروع المنسوجات الصينية مش هو الأول ولا الأخير اللي هيدخل المنطقة الاقتصادية لقناة السويس، خصوصا أن الهيئة في الفترة اللي فاتت وقعت عقود 14 مشروع بمنطقة القنطرة غرب الصناعية، بإجمالي استثمارات وصلت لـ542.3 مليون دولار في 20 شهر بس، وده بيعد إنجاز تنموي جديد لمصر على مختلف الأصعدة، وبيعبر عن الثفة الكبيرة للمستثمرين وأصحاب رؤوس الأموال الأجنبية في الاقتصاد المصري واللي اختاروا منطقة القنطرة غرب الصناعية علشان تكون وجهة لأعمالهم، والنوع ده من الصناعات جاي في أطار خطة مصر للتحول لمركز اقليمي للتبادل التجاري.

المشروعات الجديدة اللي كل يوم بتدخل المنطقة الاقتصادية لقناة السويس واللي كان اخرها مشروعات تصنيع المنسوجات، بيعكس التزام الهيئة المستمر لجذب الاستثمارات ودعم توطين الصناعات المستهدفة وخلق فرص عمل مستدامة للمصريين وبيهدف لمواصلة خطة مصر لتعزيز الصادرات المصرية وسد النقص اللي موجود في السوق المحلي والتوفير في الفاتورة الاستيرادية وزيادة الصادرات المصرية لكل دول العالم.