هو إيه اللي بيحصل في سوق الدهب؟ معقولة الجرام يوصل لأرقام محدش كان يتخيلها؟ وليه كل يوم بنسمع عن رقم قياسي جديد؟ لو بتفكر تشتري دهب أو تبيع اللي عندك.. أو حتى بس عايز تفهم اللي بيحصل في التقرير ده هنكشفلك الحكاية من أولها لآخرها.. وهنعرف الدهب رايح فين في 2025 وسعر الجرام هيبقى كام في مصر والعالم.. وهل فعلاً الدهب هو الملاذ الآمن اللي كلنا بنحلم بيه؟

الدهب دلوقتي مش مجرد معدن بيترص في البنوك أو يتلبس كزينة..  لا.. ده بقى قصة كبيرة.. و في الوقت اللي بنتكلم فيه دلوقتي يوم 2 مارس 2025، سعر الأوقية عالمياً وصل لـ2950 دولار، وده معناه إننا على بعد خطوة من حاجز الـ3000 دولار.

تخيل كده.. من سنة بس في مارس 2024، أكتر الخبراء تفاؤلاً قالوا الدهب ممكن يوصل 2300 أو 2400 دولار خلال سنة أو اتنين.. وفجأة الصيف اللي فات كسر الدهب حاجز الـ2400 وبقى يطلع زي الصاروخ.. في 2024 كلها الدهب زاد أكتر من 25%، يعني لو كنت جبت سبيكة بـ100 ألف جنيه السنة اللي فاتت دلوقتي سعرها بقى حوالي 125 ألف.

طب إيه اللي بيحرك الدهب كده؟

في كام حاجة مهمة لازم نفهمها.. أولها ان الدنيا مش مستقرة.. توترات جيوسياسية.. حروب تجارية.. والناس خايفة على فلوسها من التضخم.. كل ده بيخلي المستثمرين يجروا على الدهب لأنه الملاذ الآمن.. تاني حاجة الطلب زاد بشكل رهيب البنوك المركزية حوالين العالم بتشتري دهب بكميات كبيرة والمستثمرين كمان بيرموا فلوسهم في الصناديق المتداولة.. وتالت حاجة الدين الأمريكي بقى قنبلة موقوتة بعد ما تخطى 36 تريليون دولار وده بيخلي الدهب أمان أكتر من الدولار نفسه.

في مصر الوضع مش بعيد عن العالم سعر الجرام عيار 21 اللي هو الأشهر عندنا وصل دلوقتي لحوالي 4100 جنيه من غير المصنعية.. وده بسبب ارتباط السعر المحلي بالعالمي مع فرق العملة والطلب اللي مش بيهدى.. لو بصينا على التوقعات لـ2025 الخبراء بيقولوا إن الدهب عالمياً ممكن يوصل من 3200 لـ3300 دولار للأوقية في منتصف السنة.. وفي نهاية السنة ممكن نشوف 3500 دولار.. لو حولنا ده لسعر الجرام في مصر ومع افتراض إن الدولار يفضل حوالي 50 جنيه -وهو احتمال وارد- يبقى الجرام عيار 21 ممكن يتراوح بين 5200 و5500 جنيه في منتصف 2025 ويوصل لحوالي 6000 جنيه نهاية السنة.

طب هو الدهب هيفضل يطلع كده؟

مش بالضرورة. في خبرا كتير بيقولوا إننا في انتظار تصحيح سعري يعني هبوط مؤقت في الأسعار لكنه مش هيبقى كبير ولا طويل.. يعني لو الدهب نزل شوية في مارس أو أبريل ده هيبقى فرصة ذهبية للشراء لأنه بعدها هيرجع يطلع تاني.. وفي نفس الوقت لو الاحتياطي الفيدرالي الأمريكي خفض الفايدة في النص التاني من 2025 زي ما المحللين بيتوقعوا.. ده هيدي الدهب دفعة جديدة لفوق لأن لما الفايدة بتقل الناس بتبعد عن السندات وتجري على الدهب.

مجموعة جولدمان ساكس ودي من أكبر الشركات اللي بتحلل الأسواق رفعت توقعاتها لنهاية 2025 من 2890 دولار لـ3100 دولار للأوقية.. وبيقولوا إن الطلب من البنوك المركزية هو المحرك الأساسي لكن في ناس أكتر جرأة  بيقولوا إن 3500 دولار في نهاية السنة هدف متحفظ يعني ممكن نكسر الرقم ده كمان.

طب لو عايز تستثمر تشتري ولا تستنى؟

بص الدهب دلوقتي غالي لكن ده مش معناه إنه وقت وحش للشراء لأن الدهب مش بس استثمار للربح السريع ده تحوط وأمان لفلوسك على المدى الطويل يعني لو عندك خطة طويلة الدهب هيفضل صديقك حتى لو حصل تقلبات.. لكن لو مستعجل خلي بالك، لأن السوق ممكن يخضك لو نزل فجأة.

الأكيد ان الدهب بقى أكتر من مجرد حاجة نشتريها في الفرح.. ده بقى لعبة كبيرة في السوق العالمي.. و في 2025 التوقعات كلها بتقول إنه جايب أرقام جديدة سواء عالمياً أو في مصر.