يا ترى إيه آخر تطورات صرف الشريحة الرابعة من قرض صندوق النقد؟ وإيه اللي ممكن يحصل للاقتصاد المصري لما نصرف الشريحة دي ؟ وهل ممكن الدولار ينزل تاني في البنوك ونرتاح من وجع دماغ سعر الصرف؟  وايه تأثير صرف الشريحة على الاحتياطي النقدي فى البنك المركزي؟

آخر الأخبار بتقول إن صندوق النقد الدولي حاطط مصر على جدول اجتماعاته يوم 10 مارس اللي جاي.. يعني بعد يومين بس من دلوقتي.. والاجتماع ده عشان يناقشوا صرف الشريحة الرابعة من برنامج التمويل اللي قيمته 8 مليار دولار.. الشريحة دي لو اتوافق عليها مصر هتصرف حوالي 1.2 مليار دولار.. ودي أكبر شريحة نستلمها من ساعة ما بدأ البرنامج في 2022.. قبل كده مصر استلمت 3 شرائح.. الأولى كانت 347 مليون دولار.. والتانية والتالتة كل واحدة فيهم 820 مليون دولار.. يعني لحد دلوقتي استلمنا حوالي 1.99 مليار دولار من القرض ده.

الصندوق قبل كده قال إنهم وصلوا لاتفاق مع الحكومة المصرية على مستوى الخبراء بخصوص المراجعة الرابعة لبرنامج الإصلاح الاقتصادي.. وده معناه إن الطريق مفتوح دلوقتي عشان المجلس التنفيذي يدي الضوء الأخضر للصرف.. لو حصل كده يوم الاتنين الجاي يبقى الفلوس هتبقى في طريقها لمصر خلال مارس.

طب امتى بالظبط ممكن نشوف الفلوس دي في مصر؟

زي ما قولنا الاجتماع يوم 10 مارس.. ولو المجلس التنفيذي وافق الفلوس ممكن تتحول خلال أيام من تاريخ الاجتماع.. يعني عمليًا قبل نهاية مارس إن شاء الله الـ1.2 مليار دولار هيكونوا داخلين حسابات البنك المركزي.. ده مش كلام توقعات وبس.. ده بناءً على بيانات صندوق النقد نفسه اللي بيقول إن الموافقة النهائية هتفتح الباب للصرف على طول.

بس خلّي بالك.. الموضوع مش مجرد فلوس تدخل وخلاص.. الحكومة المصرية كانت بتشتغل على إصلاحات اقتصادية كبيرة عشان توصل للنقطة دي.. زي تحرير سعر الصرف في مارس 2024.. وتخفيض الدعم على حاجات زي الوقود.. بالإضافة لتحسين مناخ الاستثمار.. يعني الشريحة دي مش جاية ببلاش.. دي جاية عشان مصر بتثبت إنها ملتزمة بالبرنامج.

طب الـ1.2 مليار دولار دول هيعملوا إيه في الاحتياطي النقدي؟

بص يا سيدي.. الاحتياطي دلوقتي بيغطي حوالي 8 شهور من الواردات السلعية.. وده معدل كويس جدًا مقارنة بالمتوسط العالمي اللي هو 3 شهور.. لو الشريحة دي دخلت هتدي دفعة قوية للاحتياطي وهتخلّيه يقرب من مستويات أعلى حسب آخر أرقام البنك المركزي.

وده معناه إن مصر هتقدر تواجه أي صدمات خارجية أحسن.. زي ارتفاع أسعار السلع أو تراجع إيرادات قناة السويس بسبب التوترات الإقليمية.. الاحتياطي زي الدبابة بتاعة الدولة.. كل ما يكون قوي كل ما تبقى الحياة أمان أكتر للجنيه المصري وللمواطن العادي.

نيجي لسؤال مهم جدا .. هل الشريحة دي هتخلّي الدولار ينزل في البنوك ولا لأ؟

بص.. الـ1.2 مليار دولار هيزودوا توافر العملة الصعبة في السوق.. وده شيء إيجابي جدًا.. في 2024 مصر جذبت استثمارات أجنبية بـ46 مليار دولار.. وتحويلات المصريين في الخارج زادت لـ29.6 مليار دولار.. وكل ده ساعد على استقرار سعر الصرف.. لو ضفنا الشريحة الجديدة دي يبقى عندنا دفعة إضافية تخلّي الدولار متوفر أكتر في البنوك.