ازاي مصر ممكن تستغل الصراع بين أمريكا وأوروبا بسبب الرسوم الجمركية وتستفاد مليارات الدولارات كل سنة.. وايه اللي يخلي مصر مرشحة بقوة لزيادة التبادل التجاري مع دول الاتحاد الأوروبي.

هو ممكن مصر تكون بديل لأمريكا تجاريا مع أوروبا.. جايز تفتكر الكلام دا مبالغة كبيرة أو بعيدة عن الواقع لكن مفيش حاجه مستحيلة في الاقتصاد والتجارة والمال ومفيش صداقات دائمة ولا عداوة لكن مصالح مشتركة وكله بيدور على مصلحته..  
الحكاية إن فيه أزمة كبيرة كلنا متابعينها بين الولايات المتحدة وبين عدد كبير من الدول زي الصين وكندا والمكسيك ودول الاتحاد الأوروبي كلها ودا بسبب حزمة رسوم جمركية قرر الرئيس ترامب فرضها على البلاد دي .. وطبعا اي زياده في الرسوم معناها ضرر كبير بمصالح الشركات والمصانع والدول وفي نفس الوقت ارتفاع في أسعار السلع والمنتجات اللي شملها الرسوم الجمركية الصين وأوروبا وغيرها من الدول قررت طبعا ترد بالمثل واعلنت عن فرض رسوم جمركية مماثلة على واردات وسلع أمريكية وبكده بدأت حرب الرسوم والجمارك في العالم..

طيب احنا مالنا في مصر بالأزمة دي ؟
شوف حضرتك مصر في مكان مهم جدا في العالم وتقدر تستغل الأزمة دي بقوة وتستفاد منها بشكل كبير جدا هيوفرلها مليارات الدولارات كل سنة ودا عن طريق تقديم نفسها كبديل للولايات المتحدة تجاريا ولو بشكل جزئي يعني مصر ممكن تصدر المنتجات الأمريكية اللي بتسقبلها اوروبا من امريكا زي الالومنيوم والصلب والأجهزة المنزلية ومستلزمات صناعة السيارات واستغلال ميزة مهمة جدا وهي قرب مصر من أسواق أوروبا واللي هتكفي بس عبور البحر المتوسط ومصر بينها وبين اقرب دولة أوروبية زي اليونان وقبرص يادوب كام ميل بحري..

طبعا مع اشتعال الأزمة الأمريكية مع أوربا اقتصاديا وحتي سياسيا واللي بيهدد ابتعاد مصالح الحلفين مؤشر  على أن أوروبا هتدور على بدائل وشركاء استراتيجين جدد في مجال التجارة والصناعة والطاقة وهنا مفيش افضل من مصر بسبب زي ما قلنا قربها من الأسواق الأوروبية والصعود الكبير للاقتصاد المصري في السنين الأخيرة بما يؤهلها أنها تكون وحش اقتصادي وتجاري وكمان مصر عندها ميزات اقتصادية وتجارية ضخمة اووربا اكيد هتستفاد منها زي البنية الأساسية الحديثة واللوجستيات وطرق التجارة وقناة السويس وشبكات المواصلات الضخمة والمشروعات الاقتصادية في كل المجالات واللي بترشحها تكون من اقوي اقتصاديات العالم في غضون سنين كتيرة حسب توقعات مؤسسات مالية عالمية... يعني أوروبا هتراهن على دولة جارة في جنوب المتوسط وهتسفاد من بنيتها التحتية الضخمة وهتأمن نفسها اقتصاديا من خلال استيراد احتياجاتها من مصر واللي هترجع شريك قوي جدا لمصر في ظل وجود علاقات واتفاقيات استراتجية بالفعل بين مصر والاتحاد الأوروبي..

طيب السؤال الأهم.. هل مصر مؤهلة أنها تلبي احتياجات أوروبا من السلع ؟
لو قلنا إن مصر تقدر في الوقت الحالي تعمل دا يبقي بنكون بنبالغ لأن مصر لسه في مرحلة البناء والانطلاق لكن لو الأمور استمرت كده بنفس معدلات النمو والتطور في الصناعة والزراعة والسياحة والتجارة مصر هتكون شريك أساسي لأوروبا بدون منازع واوربا خدت بالها من دا وقررت تساعد في ضخ استثمارات جديدة في مصر وزيادة التعاون عشان مصر تكون شريك استراتيجي عنده قدرات تلبي السوق الأوروبية الواسعة.