إيه اللي ممكن يحصل للاقتصاد المصري بعد ما الشريحة الرابعة من قرض صندوق النقد الدولي تتصرف؟ هتعمل فرق كبير ولا هتفضل مجرد مسكن مؤقت؟ وهل مصر فعلاً هتقدر توصل لاستقرار اقتصادي ولا التحديات لسه قدامها كتير؟ وأهم سؤال.. إمتى هتيجي المراجعة الخامسة وهتجيب معاها كام مليار دولار؟ 

من كام يوم وتحديدا يوم الإتنين اللى فات صندوق النقد الدولي وافق رسميًا على صرف الشريحة الرابعة من قرض الـ 8 مليار دولار لمصر.. وده معناه انه  في خلال أيام قليلة من دلوقتي  هيخش لخزينة مصر حوالي 1.2 مليار دولار.. وهيبقى مجموع اللي مصر استلمته من القرض لحد دلوقتي حوالي 3.2 مليار دولار من أصل الـ 8 مليار.

طب إيه اللي هيحصل بعد كده؟

السيولة الدولارية دي هتساعد الحكومة إنها تلبي احتياجاتها من النقد الأجنبي.. خصوصًا مع أزمة قناة السويس اللي لسه إيراداتها متأثرة بسبب التوترات الإقليمية.. يعني ممكن نشوف تحسن في توفير السلع الأساسية وتخفيف الضغط على الجنيه شوية لكن الموضوع مش معناه ان الدنيا هتبقى وردي لأن التحديات الكبيرة لسه موجودة
طب إيه اللي جاي بعد الشريحة الرابعة دي؟

خليني أقولك على حاجة مهمة.. المراجعة الخامسة من صندوق النقد هتبقى قبل نهاية شهر يونيو  2025 يعني خلال 3 شهور بالكتير مكن دلوقتي لو كل حاجة مشيت صح… والمراجعة الخامسة مهمة جدًا.. لأن لو مصر نجحت فيها ومجلس إدارة الصندوق وافق.. هتتصرف شريحة جديدة كمان بـ 1.2 مليار دولار..يعني ببساطة، لو المراجعة الخامسة تمت بنجاح.. هيبقى مجموع اللي مصر استلمته 4.4 مليار دولار من الـ 8 مليار

طب هيفضل كام شريحة بعد كده؟

هيفضل 3 شرايح.. كل شريحة بـ 1.2 مليار دولار.. يعني لسه في حوالي 3.6 مليار دولار مستنيين في الطريق.. ودول هيتصرفوا على مراحل لحد نهاية البرنامج في 2026 لو كل حاجة ظبطت

طب إيه بقى الحاجات اللي مصر قالت للصندوق 'خلينا نأجلها شوية'؟

مصر طلبت من صندوق النقد إنها تراجع التزاماتها المالية على المدى المتوسط.. يعني بدل ما تكون ملزمة تحقق فايض أولي في الموازنة بنسبة 4.5% من الناتج المحلي في السنة المالية 2025/2026، قالت 'خلونا نقللها لـ 4% بس'عشان الحكومة عايزة مساحة أكبر تزود فيها البرامج الاجتماعية اللي بتدعم الطبقة المتوسطة والفئات الضعيفة خصوصًا مع الظروف الاقتصادية الصعبة اللي إحنا فيها.. يعني بدل ما كل الفلوس تروح في سداد ديون أو ضبط أرقام.. الحكومة عايزة توازن بين الاستدامة المالية ودعم الناس اللي فعلاً محتاجة.. وبالمناسبة الصندوق وافق على الفكرة دي لأنهم شايفين إن الضغط الإقليمي زي أزمة قناة السويس والتضخم لسه بيأثروا بقوة.

خليني أكلمك بصراحة، الـ 1.2 مليار دولار دول مش هيحلوا كل المشاكل، لكنهم خطوة كويسة .. هيساعدوا في تخفيف الضغط على البنك المركزي، وممكن نشوف استقرار نسبي في سعر الصرف لو اتوجهوا صح. لكن التحدي الحقيقي هو إن مصر لسه محتاجة تعزز إيراداتها من مصادر تانية زي التصدير والاستثمار الأجنبي، مش بس تعتمد على القروض.. وده اللي الصندوق بيحاول يضغط عليه من خلال الإصلاحات الهيكلية.. زي تبسيط النظام الضريبي وتشجيع القطاع الخاص.