يا ترى إيه اللي هيحصل يوم 17 أبريل، وإيه علاقته بالبنك المركزي المصري، هل ممكن تنعقد لجنة السياسات النقدية عشان تحدد مصير الفايدة في الفترة الجاية، ولا هيحصل حدث مختلف، وليه هيكون يوم مصيري؟

في الحقيقة، البنك المركزي المصري على ميعاد مع اجتماع جديد يوم الخميس الموافق 17 أبريل 2025، وده عشان يراجع أسعار الفائدة على الإيداع والإقراض، واللي بتوصل في الوقت الحالي لـ 27.25% و28.25% بالترتيب، ولكن في توقعات بتشير لتخفيض الفايدة خاصة بعد الإعلان عن مواصلة تراجع معدلات التضخم أو انخفاض الأسعار في مصر لشهر فبراير اللي فات.

ونقدر نقول، إن اجتماع البنك المركزي المصري في أبريل هيكون ميعاد مناسب لبدء وتيرة تخفيض الفايدة من قبل لجنة السياسة النقدية، وده في حالة تبني سياسة نقدية تيسيرية، واللي هو أصلًا توجه من البنوك المركزية العالمية، واللي أهمها الاحتياطي الفيدرالي والبنك المركزي الأوروبي وبنك إنجلترا.

لكن القرار الناتج عن اجتماع البنك المركزي المصري بالنسبة لسعر الفايدة دايمًا بيستند لمجموعة من المحددات، واللي أهمها معدل التضخم وسعر الصرف ومعدل السيولة خارج البنوك، وبناء على العناصر دي فالبنك المركزي ماخفضش الفايدة من حوالي 4 سنين.

ونقدر نقول حاليًا، إن من الصعب فى الوقت الحالي، التكهن حول نسبة تخفيض الفايدة اللي هيقررها البنك المركزي المصري في اجتماعه الجاي، خاصة وأن مش مستبعد وصول النسبة لـ 300 أو 600 نقطة أساس، وممكن جدًا يصدر قرار التخفيض خلال اجتماع استثنائي زي ما حصل السنة اللي فاتت بسبب تداعيات ذلك على الأنشطة الاقتصادية ورفع معدلات التشغيل، واللي هو أصلًا بيدفع عجلة النمو وبيدعم سعر الصرف.

طب إيه هي مزايا تخفيض سعر الفايدة في 2025؟

بص يا سيدي، ارتفاع سعر الفايدة بيزود من تكلفة الاقتراض، وبيحمل الموازنة العامة للدولة أعباء إضافية، لأن الدولة بتصدر أدوات، زي أذون الخزانة وبتتحمل سداد الفوايد عليها لحاملي الأذون، كمان الشركات والمنتجين بيلجأوا للبنوك للاقتراض، وكل ما انخفضت الفايدة بتراجع عبء الدين، وهو ده الهدف المرجو من تخفيض الفايدة.

ولو رجعنا فلاش باك، هنلاقي إن أول اجتماعات البنك المركزي المصري السنة دي، انعقد في شهور فبراير اللي فاتت، وأعلنت فيه لجنة السياسة النقدية، الإبقاء على سعري الإيداع والإقراض، أما الاجتماع التاني بقي هيكون في شهر أبريل الجاي، واللي كلنا منتظرينه لأن متوقع فيه تخفيض الفايدة.

وبالنسبة للاجتماعات المتبقية في سنة 2025 ، فهيكون الاجتماع التالت للبنك المركزي يوم الخميس الموافق 22 مايو 2025، والرابع يوم الخميس 10 يوليو 2025، والخامس يوم 28 أغسطس 2025.

أما بقى الاجتماع السادس، فهيكون 2 أكتوبر 2025، والسابع 20 أكتوبر، أما الاجتماع الثامن والأخير السنة دي بيكون يوم 25 ديسمبر.