ليه شركات عالمية زي أمازون وجوجل وشركات خليجية كبيرة بتبص على مصر وتقول.. ‘دي البلد اللي هنبني فيها مستقبلنا’؟ معقول مصر بقت الحلم اللي بيجري وراه العالم كله؟ وإيه اللي بيخلّي الشركات دي تختار مصر مركز رئيسي للدعم والخدمات؟ وإيه تأثيره على الاستثمار في مصر.. واشمعنى مصر اللي خطفت الأنظار؟

الشركات العالمية دلوقتي بتدور على طريقة توفر فيها فلوسها من غير ما تفقد الجودة.. وهنا بييجي دور مصر.. اللي بقت زي الكنز اللي كله بيحلم بيه.. تخيّل إنك شركة أوروبية أو خليجية وبتدفع رواتب موظفينك بمبالغ ضخمة.. في مصر.. نفس الشغل بيطلع بتكلفة أقل بـ 60-70% عن دول الخليج.. وحتى أقل من دول أوروبا الشرقية بفارق كبير.. مش بس كده.. بدل ما تجيب موظفين من بره وتصرف على إقامتهم وسكنهم.. بتشغّل شباب مصري شاطر ومدرب.. وكده وفرت كتير وكسبت أكتر.

لكن السؤال المهم ليه مصر تحديدا ؟

الإجابة في كام نقطة جامدة.. أول حاجة.. العمالة المصرية مش بس رخيصة.. دي كمان مؤهلة وبتتكلم لغات زي الإنجليزي والألماني بنطق يخلّي الشركات تقول.. ‘ده اللي احنا عايزينه’.. تاني حاجة.. البنية التحتية بقت على مستوى عالمي.. المدن الذكية زي التجمع الخامس والشيخ زايد بقوا مراكز جذب للشركات دي.. مكاتب مجهزة وإيجارات معقولة  وعقود مرنة تناسب كل الشركات.

السر في كل ده هو المزيج اللي مصر بتقدمه.. تكلفة منخفضة.. شغل بجودة عالية.. وحكومة بتدعم الاستثمار بقوانين مرنة وحوافز تخلّي أي شركة تقول.. ‘أنا لازم أكون هنا’.. من ساعة تعويم الجنيه في 2018.. الطلب على مصر زاد بشكل جنوني.. خصوصاً من الخليج – السعودية.. الإمارات.. الكويت – وحتى من أوروبا.. الشركات الخليجية بتحب تدفع رواتب بالجنيه المصري.. اللي هو أعلى من المتوسط عندنا لكن لسه أقل بكتير من عندهم.. وكده الكل كسبان.

والحلو إن مصر مش بس بتقدم عمالة رخيصة.. لا.. دي بتقدم كفاءة.. الشباب هنا بيشتغل في تكنولوجيا المعلومات.. الدعم الفني.. تحليل البيانات.. وبيطلّع شغل على مستوى عالمي.. وفيه شركات وسيطة كمان بقت بتساعد الشركات الأجنبية تدخل السوق بسهولة.. بتوفر لهم موظفين ومكاتب وتخلّص كل الورق بسرعة.. ده غير إن الدولة بتقدم حوافز استثمارية تخلّي مصر تنافس دول زي الهند.. لكن بميزة التكلفة اللي محدش يقدر ينافسها فيها.

طب إيه أهمية ان الشركات دي تختار مصر مركز ليها؟

يعني إنها بتفتح مكاتب خلفية – حاجة زي الدعم الإداري.. تحليل البيانات.. أبحاث السوق – من غير ما تتعامل مع العملاء مباشرة.. وده بيجيب معاه فرص شغل بالآلاف كل سنة.. وتخيّل إن السوق ده بينمو بـ 70% سنويا.. يعني كل سنة بيبقى فيه شغل جديد.. فلوس جديدة.. ودفعة للاقتصاد المصري.. الشركات دي كمان بتدفع ضرائب.. وده بيساعد الدولة تقلل الدين الخارجي وتستثمر في مشاريع أكبر.

ونيجي لتأثير ده على مناخ الاستثمار.. لما شركة عالمية تيجي وتنجح في مصر.. ده بيبعت رسالة لكل المستثمرين.. ‘مصر بلد تستاهل الاستثمار’.. بيزيد الثقة في السوق.. وبيخلّي مصر تطلع على الخريطة العالمية كمركز للخدمات الرقمية.. وكمان.. الخدمات دي بتصدّر للخارج.. بتجيب عملة صعبة.. وبتساعد الجنيه يقوى.. وطبعاً.. الشباب اللي بيشتغل في الشركات دي بيلاقي فرص حقيقية.. وده بيقلل البطالة ويخلّي الناس تحس إن فيه أمل في البلد.

في الآخر.. مصر بقت مركز إقليمي للدعم والخدمات لأنها جمعت كل الحاجات اللي الشركات بتدور عليها.. شباب شاطر.. بنية تحتية قوية.. تكلفة تنافسية.. ودعم حكومي.. الشركات العالمية اختارت مصر لأنها شافت فيها فرصة حقيقية توفر وتكسب.. ومع الوقت.. السوق ده هيكبر أكتر.. ومصر هتبقى اسم كبير في عالم الاستثمار.. يعني باختصار.. مصر مش بس بلد الهرم والنيل.. دي كمان بلد المستقبل الاقتصادي اللي العالم كله بقى عايز يكون جزء منه.