يا ترى إزاي الحكومة ممثلة في وازرة البترول هتأمن احتياجات مصر من مصادر الطاقة من دلوقتي لحد سنة 2040، هل هتلجأ لخطة بره الصندوق، ولا الاحتياطي اللي بتملكه يقدر يحقق الهدف ده؟.
في الفترة الأخيرة، وزارة البترول والثروة المعدنية، عملت خطة لتأمين احتياجاتنا من مصادر الطاقة، وسمتها استراتيجية مصر الشاملة لتنمية قطاع الطاقة، واللي بتعتمد على تنويع البحث والاستكشاف وتطوير مصادر الطاقة، عشان نضمن أمن الطاقة والاستدامة ونقدر نحقق النمو الاقتصادي المنشود.
ومن أهم بنود الاستراتيجية دي، هو الغاز الطبيعي اللي بيعتبر الوقود الانتقالي الأنسب والأقل من حيث الانبعاثات، عشان كده وزارة البترول بتطرح فرص استثمارية جديدة لزيادة الإنتاج وتعزيز أنشطة الاستكشاف في الغاز.
حاليا، كمان مصر بتسعى لتعزيز مكانتها كمركز إقليمي للطاقة، وبتستغل مواردها الوفيرة من الطاقة الشمسية والرياح وغيرها من مصادر الطاقة النظيفة عشان توصل للهدف ده، وبكده تكون بتنفذ استراتيجية الطاقة المتكاملة والمستدامة لحد سنة 2040، واللي بتهدف لزيادة نسبة الطاقات المتجددة في مزيج الطاقة المصري ل 42٪ بحلول عام 2030.
وده بيتم من خلال تنفيذ عدد من المشروعات الجديدة، زي مشروعات الطاقة الشمسية، ومحطات طاقة الرياح بمنطقة خليج السويس وغيرها من المشروعات المماثلة في المحافظات.
ضيف على كل ده، إن وزارة البترول والثروة المعدنية بتتعاون مع وزارة الكهرباء والطاقة المتجددة عشان تطور استراتيجية متكاملة لكفاءة الطاقة، وتطلق برنامج قومي بيضم مختلف أنشطة كفاءة الطاقة، وده برضو في الوقت اللي بتسعى فيه مصر عشان تكون مركز إقليمي في تجارة وتداول الهيدروجين.
والاستراتيجية ماوقفتش على كده، دي كمان بتحاول جذب الاستثمارات وتطوير المشروعات الرائدة في مجال توليد وإنتاج الهيدروجين،وكمان بيتم إقرار قانون جديد عشان يقدم حوافز ضريبية وحوافز تصدير لجذب المستثمرين أكتر في القطاع ده.
كل ده غير التعاون الإقليمي والدولي للتوسع في مشروعات الطاقة النظيفة، وبناء شراكات مستدامة لتحقيق مستقبل طاقة اكثر ازدهارا، عشان مصر تقدر تحقق هدف تأمين احتياجاتنا من مصادر الطاقة لحد سنة 2040 من ناحية، وكمان تتحول لواحدة من الدول الرائدة قي في إنتاج مصادر الطاقة من ناحية ثانية، وطبعا كل ده بيصب في صالح الاقتصاد القومي وبيدعمه بشكل مباشر.
غير كده، ده بينعكس بشكل إيجابي على حياة المواطنين، يعني توافر مصادر الطاقة هتشغل المصانع والأيد العاملة وبالتالي هيبقي في وقرة في الإنتاج، عشان كده الأسعار في الأسواق هتستقر وكمان ممكن تنزل بشكل كويس.
0 تعليق