هو ليه الدولار مش بينزل وساعات كتير سعره بيرفع وليه اتفاق صندوق النقد الأخير مكانش ليه تأثير كبير في سوق الصرف.. تعالو نقولك على أسباب قوة الدولار قدام الجنيه.

سعر الدولار لسه بيتحرك صعودا ونزولا مابين 50.50 جنيه إلى 50.70 جنيه وناس كتير بتسأل ليه الدولار منزلش اكتر من كده بعد موافقة صندوق النقد الدولي على صرف الشريحة الرابعة وكمان على قرض التنمية والاستدامة باجمالي 2.5 مليار دولار ..

عشان نبقي عارفين إن سعر الدولار بيتحدد من ساعة تحرير سعر الصرف بناء على العرض والطلب وقانون السوق من غير اي تدخل باعتبار السعر بقي حر .. يعني لما تلاقي الدولار زاد يبقي الطلب عليه بيزيد والعكس صحيح لكن تقلق في حالة واحدة بس وهي إن المعروض النقدي من الدولار يكون قليل ودا محصلش من ساعة التعويم والتدفقات الاستثمارية الضخمة اللي جت مصر من أول صفقة رأس الحكمة ولغاية دلوقتي وزيادة الموارد الدولارية لمصر من السياحة وتحويلات المصريين بالخارج والاستثمار والتصدير وغيرها من مصادر النقد الأجنبي..

نرجع لسؤالنا تاني ليه الدولار مش بينزل بشكل كبير قدام الجنيه ويبقي مثلا ب30 أو 40 جنيه مثلاً ؟
عشان نفهم الحكاية.. الموضوع ليه علاقة بحاجات كتير أهمها الطلب المتزايد على الدولار للاستيراد بعد سنة الأزمة في 2022 واللي كانت ذروة محنة الدولار لأسباب كلنا عارفينها وبعد فتح الاستيراد لسلع كانت محظور استيرادها ضمن إجراءات ترشيد النقد الأجنبي زادت فاتورة الاستيراد بشكل كبير ودا من بين عوامل تانية ضغطت على الدولار وبالارقام مثلا  ارتفع إجمالي قيمة الواردات المصرية خلال الـ 10 شهور الأولى من سنة 2024 بنسبة 10.6%، وسجلت 78 مليار دولار تقريبا مقارنة بـ 69.89 مليار دولار خلال الفترة نفسها من العام 2023  ودا حسب نشرة التجارة الخارجية الصادرة عن الجهاز المركزي للتعبئة العامة والإحصاء.. وفي الإجمالي زادت فاتورة 2024 بحوالي 12 مليار دولار عن السنة اللي قبلها .

وفي شهر يناير 2025 زادت قيمة إجمالي الواردات بنسبة 40.54 في المئة وسجلت 7.786 مليار دولار مقابل 5.54 مليار دولار خلال نفس الشهر من 2024 يعني في شهر واحد زادت 2 مليار دولار..

طبعا 12 مليار دولار زيادة في واردات 2024 دا رقم كبير جدا في سنة واحدة ومع استمرار الزيادة في أول شهور 2025 وفي وقت البلد لسه بتتعافي فيه من أزمة كبيرة جدا.. كمان فيه اسباب تانية زي ما قلنا ورا ارتفاع الدولار زي فاتورة الديون الخارجية وفوايدها واللي بتعتبر 2025 سنة صعبة بخصوص المبالغ المطلوبة منها بشكل عام وهتمثل ضغط كبير على الدولار بجانب السحب للاستيراد وكفاية تعرف إن  مطلوب من  مصر سداد 43.2 مليار دولار التزامات خارجية خلال أول 9 أشهر من العام الحالي 2025 من بينها 5.9 مليار دولار فوايد و37.3 مليار دولار أصل قروض، بحسب بيانات البنك الدولي.

وبتتوزع الالتزامات بين قروض بقيمة 17.1 مليار دولار و20.5 مليار دولار ودائع واتفاقيات مبادلة عملة يتعين على البنك المركزي سدادها بخلاف 272 مليون دولار ودائع وعملات مُستحقة على البنوك، و3.1 مليار دولار أوراق دين، وحوالي2.1 مليار دولار تسهيلات تجارة.

كل الأرقام الضخمة اللي قلناها دي بتقول حاجة مهمة جدا وهي قوة وصمود الجنيه المصري لغاية دلوقتى لانه لو الأرقام دي صرفتها مصر من غير وفرة الدولار كانت هتبقي في أزمة كبيرة جدا جدا وتلبية كل الالتزامات دي بدون أزمات في سوق الصرف دليل على توافر الدولار بشكل كبير في البنوك المصرية وبدون أي عقبات وإن التدفقات مستمرة في الزيادة بدليل إشادة التقارير الدولية بالاقتصاد المصري وموافقة صندوق النقد الدولي على صرف جزء من القرض.. واكيد مع خطة الحكومة لزيادة الصادرات وخفض الواردات من خلال توطين الصناعة والانتهاء من سداد ديون 2025 سعر الدولار هياخد اتجاه هبوط قوي أمام الجنيه لأن زي ما قلنا الموضوع عرض وطلب بس.