هو إيه اللي بيحصل في برنامج الطروحات الحكومية في مصر دلوقتي.. وإيه الشركات اللي الحكومة ناوية تبيعها.. ومين صناديق الاستثمار اللي ممكن تشتريها.. أسئلة كتير بتدور في دماغنا اليومين دول.. وعلشان كده.. هنحكي مع بعض الحكاية كاملة.. ونعرف آخر التطورات في الموضوع ده.

في الفترة الأخيرة.. الحكومة المصرية أعلنت عن خطط جريئة لطرح حصص من شركاتها في السوق.. الخطوة دي مش بس هتزود من مشاركة القطاع الخاص.. لكنها كمان هتجيب استثمارات جديدة وتدعم الاقتصاد.

وخلينا نقول لحضراتكم  إيه آخر المستجدات في برنامج الطروحات الحكومية..

رئيس الوزراء المصري الدكتور مصطفى مدبولي أعلن في ديسمبر 2024 عن نية الحكومة طرح 10 شركات على الأقل خلال 2025.. منهم 4 شركات تابعة للجيش.. الشركات دي بتشمل شركة "وطنية".. متخصصة في خدمات الوقود.. وبتمتلك حوالي 255 محطة خدمة.. بالإضافة إلى 20 محطة تحت الإنشاء و25 محطة في مرحلة التخطيط

شركة "صافي".. وهي  متخصصة في إنتاج وتوزيع المياه المعدنية والمنتجات الغذائية.. وشركة "شل أوت".. متخصصة في تقديم الخدمات البترولية والتجزئة.. وشركة "سايلو".. متخصصة في مجال التخزين والخدمات اللوجستية.

وبالإضافة للشركات دي.. الحكومة بتخطط لطرح حصص في بنوك "الإسكندرية" و"القاهرة".. وده بجانب الطرح الناجح لـ"المصرف المتحد" في البورصة المصرية.

الحكومة بتستهدف تنويع طرق الطرح بين الاستثمار المباشر والطرح في البورصة.. على سبيل المثال.. تم طرح 30% من أسهم. "المصرف المتحد" في البورصة المصرية.. وجمع حوالي 4.6 مليار جنيه مصري.. الطرح ده شهد إقبال كبير.. حيث تم تغطية الطرح العام بحوالي 59 مرة.. وطرح المؤسسات بحوالي 6 مرات.

بالنسبة لصناديق الاستثمار اللي ممكن تشارك في الطروحات دي.. فالحكومة بتستهدف جذب استثمارات محلية ودولية.. في السابق.. كان فيه محادثات مع صندوق الاستثمارات العامة السعودي لشراء حصة في "المصرف المتحد".. لكن المحادثات دي ما اكتملتش.. ورغم كده .. الحكومة مستمرة في جذب صناديق استثمارية تانية للمشاركة في الطروحات المستقبلية.

طب أهداف برنامج الطروحات الحكومية ؟

برنامج الطروحات الحكومية بيهدف لتحقيق عدة أهداف.. منها .. زيادة مشاركة القطاع الخاص.. من خلال طرح حصص في الشركات الحكومية.. الحكومة بتسعى لتعزيز دور القطاع الخاص في الاقتصاد.. وجذب الاستثمارات الأجنبية لأن الطروحات دي بتوفر فرص للمستثمرين الأجانب للدخول في السوق المصري

كمان من الأهداف تعزيز الشفافية والكفاءة.. من خلال إدراج الشركات في البورصة.. ده بيزيد من مستوى الشفافية وبيحسن من كفاءة الشركات

وايه التحديات المحتملة؟

بالرغم من الفوائد المتوقعة.. فيه تحديات ممكن تواجه برنامج الطروحات.. زي تقييم الشركات.. تحديد القيمة العادلة للشركات ممكن يكون تحدي.. خاصة في ظل التقلبات الاقتصادية.. وجذب المستثمرين لأن فيه منافسة كبيرة على جذب الاستثمارات.. وده بيتطلب تقديم حوافز وتسهيلات للمستثمرين

كمان من التحديات الإجراءات البيروقراطية وده لأن  تسهيل الإجراءات وتقليل البيروقراطية مهم لضمان نجاح الطروحات.

اللى لازم نكون عارفينه ان برنامج الطروحات الحكومية في مصر خطوة مهمة نحو تعزيز الاقتصاد وجذب الاستثمارات.. مع التنفيذ الجيد والتغلب على التحديات.. ممكن نشوف تأثير إيجابي كبير على المدى الطويل.