يا ترى إيه اللي هيحصل للدهب تاني بعد موجات الارتفاع المتتالية اللي حصلت مع بداية السنة دي 2025، هل ممكن المعدن الأصفر يحقق ارتفاعات تانية بنهاية السنة ولا ممكن نلاقي هبوط مفاجىء حصل، ومع كل الظروف الغامضة دي إيه هو أفضل وقت للشرا أو للبيع.

واقعيًا، الدهب دلوقتي بيسجل أعلى مستوياته العالمية، ووصل سعر الأونصة لـ3 آلاف دولار عشان الأسعار تبقى نار في كل الأسواق العالمية.

أما بقى عن توقعات الأسعار في الفترة الجاية، فمتوقع جدًا تحقيق ارتفاعات جديدة وده بسبب تزايد احتمالات اندلاع حرب تجارية عالمية طويلة الأمد بين أمريكا والصين، وده سيناريو اتوقعه المحللين، عشان كده دلوقتي بيلجأ المستثمرين لشراء كميات أكبر الدهب لأنه ملاذ آمن ومخزن كويس لفلوسهم.

واتوقع بنك جي بي مورجان، إن سعر المعدن الأصفر يوصل لـ 3200 دولار للأونصة خلال الربع التاني من سنة 2025، وده بسبب النزاع التجاري المتصاعد، واللي ساهم في تعزيز مكانة المعدن النفيس كمخزن للقيمة في الفترات اللي بيسودها الضبابية.

كمان، خطة الرئيس الأميركي دونالد ترامب لفرض تعريفات جمركية انتقامية واسعة النطاق، وكمان الجمارك الإضافية اللي هيفرضها على قطاعات بعينها بداية من شهر أبريل، بتعتبر خطر كبير جاي في السكة، وهيهز الأسواق العالمية، وبالتالي هتزيد المخاطر الاقتصادية ومعاها هترتفع أسهم الدهب للسماء.

ونقدر نقول، إن الدهب هيستفيد من تدهور آفاق الاقتصاد الأمريكي، فمع توقعات خفض أسعار الفايدة من قبل بنك الاحتياطي الفيدرالي الأميركي، هتزيد المخاوف من حدوث ركود اقتصادي، وبالتالي هيلجأ المستثمرين لضخ فلوسهم في الدهب، عشان هو هو الحل الأمثل من منظورهم.

عندك كمان، بنك "يو بي إس" ، اللي اتوقع رفع أسعار المعدن الأصفر لـ 3500 دولار للأونصة في الربع الثاني من 2025 عشان تبقى الدهب الحصان الرابح وبقوة الفترة دي وكمان الفترة الجاية.

ولو قيسنا التوقعات دي على السوق المصري، فهنلاقي الأسعار عندنا ممكن توصل لـ4500 جنيه للجرام عيار الـ21 اللي هو أكثر انتشارًا وشراءًا بين المصريين، أما عيار الـ24 فهيسجل أرقام قياسية ممكن توصل لـ5 آلاف جنيه.

عشان كده لو معاك فلوس وعايز تشتري دهب، استغل الفرصة وماتستناش كتير، أما لو عايز تبيع فالسوق مفتوح لك عشان تحقق أكبر مكسب.