يا ترى الحكومة ناوية على إيه في ملف صناعة الهواتف المحمولة محليًا؟ وليه فجأة بقينا بنسمع عن تصنيع محلي وقرارات جديدة؟ وهل ده هيأثر علينا كمستخدمين؟ خلينا نفهم الموضوع سوا.
مصر داخلة بقوة في عالم تصنيع الموبايلات.. الحكومة بقت مهتمة جدًا بالقطاع ده وبالفعل بدأت تاخد خطوات جدية علشان تتحول لمركز إقليمي لتصنيع الهواتف المحمولة.
وزير الاتصالات عمرو طلعت قال إننا في 2024 قدرنا ننتج 3 مليون موبايل محليًا .. والخطة إن الرقم ده يوصل لـ9 مليون بحلول 2026.
لكن ليه الاهتمام الكبير ده بتصنيع الموبايلات محليًا؟
السبب الرئيسي هو تقليل الاعتماد على الاستيراد وتوفير العملة الصعبة.. ولما نصنع موبايلاتنا هنا.. بنقلل الفاتورة اللي بندفعها للخارج .. ده غير إن التصنيع المحلي بيوفر فرص عمل جديدة للشباب في مجالات التصنيع والتكنولوجيا.
لكن إيه علاقة التصنيع بالرسوم اللي اتفرضت على الموبايلات المستوردة؟
هنا بتيجي النقطة المهمة.. الحكومة فرضت رسوم جمركية بنسبة 38.5% على الهواتف المستوردة .. الخطوة دي هدفها تشجيع الصناعة المحلية وتقليل التهريب اللي كان بيأثر سلبًا على الاقتصاد.
طب .. هل ده معناه إن أسعار الموبايلات هتغلى؟
بصراحة .. آه.. الرسوم الجديدة دي هتخلي أسعار الموبايلات المستوردة تزيد بنسبة تتراوح بين 15% و30% .. وده ممكن يخلي ناس كتير تفكر في البدائل المحلية.
لكن هل الشركات العالمية هتصنع في مصر فعلًا؟
أيوة .. وده الخبر الحلو.. شركات زي سامسونج ونوكيا وفيفو وشاومي بدأوا بالفعل في تصنيع موبايلاتهم هنا .. وفي كلام إن أوبو وريلمي هينضموا قريبًا .. وده معناه إننا هنلاقي موبايلات بجودة عالية مصنوعة في مصر.
وإزاي ده هيأثر علينا كمستخدمين؟
بالنسبة لينا .. ده معناه خيارات أكتر وأسعار ممكن تكون أفضل على المدى الطويل .. كمان هنضمن إن المنتجات اللي بنشتريها مطابقة للمواصفات ومش مهربة.
المؤكد ان مصر بتاخد خطوات جريئة فى اتجاه توطين صناعة الموبايلات .. وده ممكن يكون ليه تأثيرات إيجابية على الاقتصاد وفرص العمل .. لكن في نفس الوقت .. لازم نكون مستعدين لتغيرات في السوق والأسعار .. المهم إننا نبقى على دراية باللي بيحصل ونختار الأنسب لاحتياجاتنا.
ومصر بتحاول تبقى لاعب أساسي في صناعة الموبايلات بدل ما تبقى مجرد مستوردة. زي ما قلت، في 2024 أنتجنا 3 مليون موبايل، والهدف 9 مليون بحلول 2026. ده مش مجرد كلام، لأن الشركات العالمية زي سامسونج ونوكيا وشاومي فعلاً بدأوا يفتحوا مصانع هنا. يعني الموضوع جد، وفيه خطة واضحة.
0 تعليق