الأحد، 30 مارس 2025 05:50 م 3/30/2025 5:50:17 PM

هاجم إسلام بحيري التنويريين يوسف زيدان وخالد منتصر بعد رفضهم قرار الإفتاء بشأن موعد عيد الفطر في مصر. 

كما أوضح إسلام بحيري: هكتب في موضوع استطلاع الهلال وأمري لله ولو سمحت اقرأ بهدوء لأن التنوير الحقيقي مش زياط واختلاف لمجرد الاختلاف، الموضوع عايز شرح أتمنى أعرف أوجزه إحنا بنصلي على توقيت محسوب بإيه؟ الإجابة: محسوب بالشمس شروق ومنتصف وزوال وغروب وليل وفجر طيب ربنا أطلق على ده تسمية إيه في القرآن؟ الإجابة: سماها أوقات إِنَّ ٱلصَّلَوٰةَ كَانَتۡ عَلَى ٱلۡمُؤۡمِنِینَ كِتَـٰبࣰا مَّوۡقُوتࣰا يبقى دي يا غالي مواقيت الشمس طيب سؤال هل الشمس دي بتظهر وتزول وتغرب في إسنكدرية والجونة في وقت واحد؟ الإجابة: لا في مواقيت مختلفة وهنا بيختلف وقت الصلاة ما بين مدينتين في نفس البلد طيب ليه منصليش في وقت واحد في مصر كلها؟ الإجاب: لأن مواقيت ظهور الشمس في الأفق وغروبها مختلفة من مدينة للتانية.

وأكد بحيري: نخش على السؤال المهم الشمس لما بتغرب في إسكندرية مثلا بتغرب في الأفق اللي ناس شايفاه ولا بالتلسكوب؟ الإجابة: بتغرب في أفق نظرك أنت بمعنى لو ركبت طيارة فورًا بعد ما صليت المغرب من مطار إسكندرية هتشوف الشمس فوق لم تغرب هل هتصلي المغرب تاني؟ الإجابة: لا نهائي ليه لا برغم إنك شايفها من الطيارة لم تغرب؟ عشان أنت ملكش غير الالتزام بالأفق اللي أنت شايفه وحاسه وساكن جغرافيا فيه مش أفق فوق السماء ولا أفق مدينة تانية تمام كده؟ تعالى بقى للهلال بتاع بداية الشهر ربنا أطلق عليه نفس وصف اتباع ضوء الشمس في الصلاة وقال في القرآن یَسۡـَٔلُونَكَ عَنِ ٱلۡأَهِلَّةِۖ قُلۡ هِیَ مَوَ ٰ⁠قِیتُ لِلنَّاسِ وَٱلۡحَجِّۗ.

موعد عيد الفطر

وتابع: نطبق عليه قاعدة المواقيت لأنه معتمد على نفس الرؤية في نفس الأفق وبالتالي التزامك ببدء الشهر بالضبط زي مثال التزامك بأداء صلاة المغرب قبل ركوب الطيارة حسب غروبها في أفقك أنت اللي أنت شايفه وليس بكل أفق في أي مدينة أو بلد بالعموم إذن ميلاد الهلال فلكيا بالحسابات ليس معناه على الإطلاق إنه ظهر في الأفق الذي تعيش أنت فيه مفهوم كده؟ لأنه ممكن يولد حسابيا لكن لا يظهر في الأفق اللي أنت شايفه أو عايش في منطقته، وده بالضبط زي غروب الشمس في إسكندرية وبعد طلوعك للطيارة في أفق أعلى تجدها لم تغرب فالالتزام هنا هيكون باللي شفته في أفق إسنكدرية على الأرض وده بالضبط نفسه الالتزام بالهلال لما يظهر في أفقك وليس حينما يولد فلكيا.

واستكمل: فالخلاصة التنوير مش زيطة على أي حاجة واللي عمله المفتي في مصر هو الصحيح والدين هنا لا يضاد العلم إطلاقا لأنه الموضوع هنا لا علاقة له بالعلم الموضوع التزام شعوري بما تراه بعينك من ضوء الشمس والقمر والأفق والمكان الجغرافي المتواجد أنت فيه فقط وملوش أي علاقة إنك تكون عالم في ناسا وعندك تلسكوب في البلكونة.