يا ترى هل ممكن تحصل قفزات تانية لأسعار الدهب في مصر بعد ما تخطى الجرام " 21" سعر الـ 4200 جنيه.. طب هل في مؤشرات على استمرار موجة الصعود ولا ممكن يحصل هبوط مفاجئ، وإيه هي الأسباب اللي بتتحكم في تسعير الدهب سواء عالميا أو في مصر، والتوقعات رايحة على فين.

طبعا كلنا تابعنا موجة صعود أسعار الدهب اللي بدأت مع منتصف شهر مارس، واللي بسببها حصلت ارتفاعات قوية جدا، وده لعدة أسباب أهمها حالة عدم اليقين في الأسواق العالمية نتيجة التطورات الجيوسياسية والسياسات الاقتصادية الأمريكية، خاصة حرب الرسوم الجمركية اللي فرضها على الصين وكندا وغيرها من الدول. 

عشان كده، الدهب سجل مستوى قياسي، ووصل سعر الأونصة عالميا ل 3,000 دولار، عشان تحقق ارتفاع بنسبة 47% منذ بداية سنة 2025، وده بيعكس الإقبال الكبير على المعدن الأصفر كملاذ آمن في ظل التوترات الاقتصادية والسياسية المتزايدة.

ولو ماتعرفش، ففي وقت التوترات الاقتصادية، بيلجأ المستثمرين وأصحاب رؤوس الأموال وكمان البنوك المركزية في معظم دول العالم، لشراء كميات كبيرة من الدهب عشان تتحوط بيها كويس من الأزمات الاقتصادية اللي ممكن تحصل وتأثر على اقتصادات الدول، عشان كده الدهب بيظل الملاذ الآمن للادخار ومخزن للفلوس.

نيجي برضو لسبب تاني ورا الارتفاعات الكبيرة في أسعار الدهب واللي بينها فرض الولايات المتحدة الأمريكية عقوبة على عمليات نقل النفط الإيراني، وكمان استمرار التصعيد في الحرب التجارية بين إدارة الرئيس الأمريكي دونالد ترامب والصين والاتحاد الأوروبي، فكل ده ساهم في زيادة المخاوف من تباطؤ النمو الاقتصادي العالمي، ودفع المستثمرين لزيادة حيازاتهم من الدهب كأصل تحوطي ضد تقلبات الأسواق، واللي ممكن جدا يتسبب في حدوث مزيد من الارتفاعات في الأسعار في الفترة الجاية.

أما بقى علاقة ارتفاع أسعار الدهب بالنفط، فنقدر نقول إن "خام برنت" ارتفع بنسبة 80% عشان يوصل 70.4 دولار للبرميل، وكمان صعد خام "نايمكس" بنسبة 78% عشان يوصل ل 76 دولارًا للبرميل، وده حصل نتيجة القيود المفروضة على الصادرات الإيرانية والتوترات الجيوسياسية المتصاعدة في منطقة الخليج.

وارتفاع أسعار النفط هي كمان ساهمت في دفع اسعار الدهب لمستويات غير مسبوقة، وكمان في توقعات بتؤكد على استمرار موجة الصعود لللمعدن الأصفر في حالة ماحصلتش انفراجة في الأوضاع السياسية والاقتصادية العالمية.

والكلام ده معناه إننا على وشك حدوث موجات ارتفاعات جديدة لأسعار الدهب عالميا، واللي هتتأثر بيها كل دول العالم بما فيها مصر، عشان توصل أسعار جرام الدهب عيار 21، وفقا للتوقعات، لسعر 5300 بنهاية السنة دي 2025.

واخيرا، لو حضرتك بتستثمر فلوسك في الدهب وعايز تبيع أو تشتري، فياريت تراقب السوق كويس وتتطلع دايما على توقعات الأسعار، بعدين تقتنص الفرصة المناسبة وتحقق هدفك.