يا ترى ليه البنك المركزي لسه بيطبع الـ 10 جنيه القديمة مع إن فيه ورقة بوليمر جديدة شيك ومتطورة؟ .. هو فيه حد بيحب يفضل يستخدم حاجة قديمة لما يلاقي الجديد أحسن وأقوى؟ .. ولا فيه سر كبير ورا القرار ده؟

أول حاجة لازم نفهمها .. البنك المركزي المصري مش بيعمل حاجة عبث .. كل خطوة محسوبة وفيها استراتيجية .. في يوليو 2022 البنك المركزي نزّل أول ورقة بوليمر في تاريخ مصر .. الـ 10 جنيه الجديدة .. ورقة متطورة وشيك جدًا .. معمولة في مطبعة العاصمة الإدارية الجديدة .. أكبر مطبعة في الشرق الأوسط وأفريقيا .. ودي مش مجرد ورقة فلوس .. دي قفزة تكنولوجية .. تخيّل ورقة تدوم من 2.5 لـ 5 مرات أكتر من الورقة العادية .. يعني متينة ومش بتتفشكل بسرعة .. وكمان فيها حماية عالية ضد التزوير .. نافذة بوليمر كبيرة بصور ثلاثية الأبعاد .. أشعة فوق بنفسجية .. وطباعة غائرة صعب تقليدها .. ده غير إنها صديقة للبيئة وقابلة للتدوير .. يعني بتخدم رؤية مصر 2030.

التصميم كمان تحفة .. على وشها العربي فيه مسجد الفتاح العليم الحديث .. وعلى الوش الإنجليزي تمثال الملكة حتشبسوت .. يعني مزيج بين الماضي والمستقبل .. حاجة فعلاً تخليك تحس إن العملة دي بتحكي قصة مصر.

طب لو الورقة دي بالجمدان ده كله .. ليه لسه بنلاقي الـ 10 جنيه القديمة ؟و ليه البنك المركزي مش بيوقفها وخلاص؟

الحكاية مش كده .. فيه أسباب منطقية وذكية ورا القرار ده .. تعالى نشوفها واحدة واحدة.

أول حاجة .. البنك المركزي عايز يعمل تحول تدريجي .. مش عايز يصدم الناس .. تخيّل لو فجأة الـ 10 جنيه القديمة بطلت تشتغل .. الناس هتبقى في حوسة .. المعاملات اليومية هتتعطل .. والناس اللي مش متعودة على البوليمر هيترتبكوا .. فالبنك قال لا .. هنمشي خطوة خطوة .. الورقتين هيفضلوا شغالين مع بعض .. الجديدة تدخل السوق بشويش .. والقديمة تستمر لحد ما الناس كلها تتعود .. ودي حاجة حصلت في دول تانية لما حولوا للبوليمر .. يعني مش اختراع مصري .. دي استراتيجية عالمية.

تاني حاجة .. الموضوع ليه علاقة باللوجستيات .. يعني تخيّل كمية الـ 10 جنيه اللي موجودة في السوق .. دي فئة منتشرة جدًا .. لو عايزين نستبدلها كلها مرة واحدة .. ده محتاج وقت طويل للإنتاج والتوزيع .. وكمان الناس محتاجة تتكيف مع الشكل الجديد .. فالبنك قال بدل ما نعمل فوضى .. نسيب القديمة تكمل ونوزّع الجديدة على مهلنا .. كده مفيش نقص في الفلوس وكل حاجة ماشية تمام.

تالت حاجة .. فيه ناس لسه مش متظبطة مع فكرة البوليمر .. يمكن بيحسوا إنها غريبة أو مش عارفين يتعاملوا معاها .. فالبنك عايز يدي وقت للتوعية .. يعرف الناس إزاي الورقة دي أحسن وأمان أكتر .. ومع الوقت الناس هتبقى كلها عارفة قيمتها.

ورابع حاجة .. الاستقرار الاقتصادي .. لو غيّرنا الفلوس فجأة .. ممكن يحصل اضطرابات في السوق .. الناس تبدأ تشك في قيمة الفلوس .. وده آخر حاجة البنك المركزي عايزها .. فالنظام المزدوج ده بيحافظ على الاستقرار .. وفي نفس الوقت بيدخّل التحسينات الجديدة.

آخر حاجة .. الموضوع فيه كفاءة تكلفة .. صحيح الورقة البوليمرية أرخص على المدى الطويل عشان بتدوم أكتر .. لكن لو استبدلنا كل الـ 10 جنيه القديمة مرة واحدة .. التكلفة هتبقى عالية جدًا في الوقت الحالي .. فالبنك بيوزّع التكلفة دي على فترة أطول .. يعني خطة ذكية وموفرة.

يعني البنك المركزي مش بيطبع الـ 10 جنيه القديمة عشان عايز يفضل في الماضي .. لا .. هو بيعمل كده عشان يضمن إن التحول للبوليمر يحصل بسلاسة .. من غير ما يعطل حياتنا أو يربك السوق .. وده بيثبت إن البنك عنده رؤية .. بيمزج بين التكنولوجيا الحديثة والواقع العملي .. والدليل إنه بعد الـ 10 جنيه .. نزّل الـ 20 جنيه بوليمر في 2023 .. يعني الموضوع مستمر والخطة ماشية.