أكد الإعلامي عمرو أديب أن قرار الحكومة زيادة أسعار الوقود في الوقت الحالي خاطئ مشيرا إلى أن الزيادة كبيرة.

وقال أديب خلال برنامج "الحكاية" المذاع على قناة "أم بي سي مصر": " الناس اللي بتاخد القرار محسوش أن ده كتير؟ أنت قدامك وقت من هنا لآخر السنة أنت كان قرارك أنك مش هتشيل كل الدعم السنادي ولكن فجأة بتقول هتشيله السنادي برميل النفط نزل طيب أنت شاري شهرين تلاته وبعد كده هتبعهولنا بالغلاء؟ مصر هي الدولة الوحيدة اللي في هذه الظروف المواطن يروح محطة البنزين يدفع فلوس أكتر".

وأضاف: "على فكرة احنا في تاني مرة أول مرة قالولنا شيلنا الدعم ولكن الدولار نط من 30-50 أنا عايز أسأل سؤال مين مسؤول عن الكلام ده أه في ظروف ولكن التعامل مع الأزمة؟ يؤسفني أن أقول لحصرنك أن القرار ده مش صح والأرزاق على الله".

وتابع: "كان ممكن يتعمل بمليون طريقة تانية الناس يا جماعة الناس طالعة من العيد يادوب العيد خلص وأنت عارف أنا طالع من رمضان والعيد هل الناس اللي موجودة التجار وأصحاب العربيات هيبقوا رحماء؟ أبدا أنت بكرة اسمع الخناقات في الميكروباصات، الناس دي هتعملها ايه أنا شايفك واخد القرار ومبتكلمش الناس".

وواصل: "هنقعد كده في الاختفاء كله يدخل المغارة بقي لغاية لما الناس تهدي، كل التصريحات ايه أصل دي زادت كذا ودي زادت كذا طيب أنت عملتلي ايه كحكومة ما أنا بكرة أجي اشتغل زيك وأزود الأسعار وخلاص أمال انت شغلتك ايه".