الجمعة، 01 نوفمبر 2024 01:08 م 11/1/2024 1:08:18 PM

علق الإعلامي إبراهيم سعيد، على تصريحات محمد رمضان المدير الرياضي بالنادي الأهلي، بشأن تصريحاته الأخيرة والتي قال فيها إنه يعمل على تقويم اللاعبين وليس ذبحهم.

وقال سعيد في تصريحات تليفزيونية عبر شاشة «النهار»: «تصريح محمد رمضان كان بيتكلم فيه عن كهربا، ودي حاجة دلع، وكل زمن وليه الوقت بتاعه والشخصية والتعامل بتاعه، وأنا واحد من الناس كنت بتمنى يحصل معايا كده، عمركم شوفتوا واحد ضيع فرصة اتخصم منه 5 آلاف جنيه، وعلى قلبي زي العسل».

وأضاف: «الواحد كان نفسه يلعب في الزمن ده الصراحة، محمد رمضان والخطيب كانوا دلعوني والحياة كانت هتبقى جميلة، يلا الحمدلله كل زمن وليه الشخصية بتاعتها».

وأكمل: «طريقة التعامل مع كهربا كانت ممتازة، كلنا بنغلط وتحديدًا اللاعبين بيتحطوا تحت ضغط جماهيري ونفسي كبير وأنه بيكون مش بيشارك وبيبقى في عصبية، بس ده شيء إيجابي أنك تقومه».

وزاد: «كهربا هو اللي في أيده يبقى موجود في الملعب، محتاجين نشوفه في أداءه وتركيزه ومستواه المعروف، مش عايزينه يمسك الفانلة ويسقف ويداعب الجمهور، من الآخر أنت لعيب كورة أساسي بتموت نفسك ونشوف الشخصية بتاعتك».

وأتم: «كهربا هيعاني الفترة اللي جاية في المشاركة ممكن يلاقي نفسه برا التشكيل كتير، ويلعب دقيقة والحكم يصفر ينهي المباراة، بس لما تيجي الفرصة لازم متبقاش مقموص وتكرر المشكلة تاني، ركز في تمرينك عشان لما تنزل الملعب تبقى واقف على رجلك».