منصات بانكير قدمت عدد مهم من التقارير الهامة في الشأن الاقتصادي والمالي المصري.. البداية ملف الاستثمارات الخارجية والتطورات الجديدة.

وقال التقرير إنه من مارس 2024 وسوق الصرف في مصر بيتعامل وفق قواعد السوق والعرض والطلب من غير اي تدخل من البنك المركزي المصري أو الحكومة .. وللتاريخ كان قرار تعويم الجنيه أو تحرير سعر الصرف نقطة فاصلة في الاقتصاد المصري على كل المستويات لأنه فتح الباب لصفقات استثمارية ضخمة.

واشار التقرير إن بداية الاستثمارات الضخمة بعد قرار التعويم كانت بصفقة رأس الحكمة واللي بتعتبر أكبر صفقة من نوعها في تاريخ مصر وبتوصل حجم استثماراتها النهائية باكتمال المشروع لـ 150 مليار دولار اتدفع منها 35 مليار دولار.

وشرح التقرير إنه بعد صفقة رأس الحكمة بدأت مصر تستقبل صفقات تانية من كل دول العالم وخاصة الخليج العربي والصين وروسيا.

وسلط تقرير بانكير الضوء على التطورات الاخيرة في ملف الاستثمارات وقال إنه خلال 24 ساعة تقريبا مصر اتعاقدت على صفقات استثمارية وفرص مشروعات وصلت في مجموعها حوالي 23 مليار دولار مرة واحدة وهي استثمارات قطرية وسعودية وكان للريس السيسي دور مباشر فيها..

وقدم التقرير تفاصيل عن الصفقات دي وقال إن مصر وقطر كشفوا عن حزمة استثمارات قطرية في مصر بـ 7.5 مليار دولار ودا بعد لقاء الرئيس  السيسي مع رؤساء وأصحاب الشركات القطرية ورجال الأعمال القطريين على هامش زيارته لقطر.

وأشار التقرير إنه على صعيد الاستثمارات السعودية تم عقد ملتقى استثماري سعودي مصري بمشاركة عدد من الوزراء المصريين و المسؤولين السعوديين و أعلن بندر العامري رئيس مجلس الأعمال السعودي المصري عن خطط لضخ استثمارات سعودية جديدة في مصر تُقدّر بـ 15 مليار دولار  ودا رقم ضخم هيضاف للاستثمارات السعودية القائمة بالفعل في مصر. واللي بتوصل ل30 مليار دولار من خلال أكتر  من 7,200 شركة سعودية بتعمل حاليا في السوق المصرية .

وشرح التقرير إن الصفقات الاخيره الضخمة معناها زيادة كبيرة في تدفقات الدولار بالسوق المصرفي المصري وانتكاسة للدولار واللي سعره هينزل الفترة الجاية وفق قانون العرض والطلب ودا بالتزامن مع الزيادات المستمرة في موارد الدولة الدولارية التانية.

منصات بانكير قدمت تقرير مختلف عن أخر تطورات برنامج الطروحات الحكومية.

واستهل التقرير بالتأكيد على إن الحكومة في الوقت الحالي عندها مهمة كبيرة جدا وهي استكمال طرح بعض الشركات المملوكة للدولة للشراكة للقطاع الخاص بهدف تحقيق مكاسب مالية منها واعادة ترتيب دورها في تحقيق فائض في الانتاج القومي والتخارج.

وشرح بانكير إن الدكتور مصطفي مدبولي رئيس مجلس الوزراء كشف إن الحكومة هتطرح شركات بالبورصة خلال العامين الحالي والمقبل شركات جديدة وهي شركة وطنية وشل أوت وسايلو الغذائية وصافي والشركة الوطنية للطرق ودي كلها شركات تابعة للجيش.
وحسب التقرير أكد أن اجمالي عدد الشركات اللي الحكومة بتعتزم طرحهم للشراكة مع القطاع الخاص هيوصلوا لـ 10 شركات على الأقل في  2025، منهم 4 شركات مملوكين للقوات المسلحة.

وكشف تقرير بانكير إن وزارة الطيران الفترة اللي فاتت وصل لها اكتر من عرض من عدد كبير من كبريات الشركات حولين العالم للدخول في شراكة مع الحكومة لإدارة المطارات، والعروض دي جت من دول عربية وأجنبية، وده بيؤكد أن الاقتصاد المصري ماشي علي الطريق الصحيح خصوصا أن مفيش مستثمر هيدخل يرمي فلوس علي الأرض بدون ما يبقي عارف أن هيكسب منه كام.

وقا التقرير إن وزارة الطيران المدني بتدرس  حاليا العروض اللي وصلت لها علشان تختار افضلهم واكتر عائد وافضلهم من الناحية الأدارية والعرض اللي مش هياثر علي عمل الجهات الأمنية والإدارية الحكومية في المطارات، خصوصا أن المطارات بتعد واحدة من بوابات مصر الخارجية.

وكشف التقرير إن أول المطارات اللي الدولة هتطرحها للشراكة مع القطاع الخاص هيكون مطار الغردقة، الشراكة دي هتكون في المناطق الاقتصادية الموجودة في المطارات بس، وهتشمل تشغيل مطاعم وكافتيريات وبازارات لاشهر الماركات العالمية.

وحدة أبحاث بانكير قدمت النهاردة تقرير خاص عت الاكتشافات البترولية الجديدة وتأثيرها على خريطة الطاقة في مصر

وقال التقرير إن شركة خالدة للبترول نجحت في تحقيق 3 اكتشافات بترولية جديدة للزيت الخام والغاز في الصحراء الغربية هتضيف مخزون ضخم يُقدّر بحوالي 12 مليون برميل زيت مكافئ.. ومنها احتياطي مسترجع يوصل لـ 4 مليون برميل زيت مكافئ.

وشرح التقرير إن الاكتشافات دي جزء من خطة كبيرة من وزارة البترول عشان تعظم الإنتاج وتشجع الشركات العاملة في المجال على زيادة أنشطة الحفر والاستكشاف .. وده بيعكس إمكانيات قطاع الطاقة المصري الواعدة .. يعني بمعنى أبسط .. إحنا بنحط أقدامنا على أول الطريق عشان نكون مركز إقليمي للطاقة في المنطقة.

وشدد التقرير إن الاكتشافات الجديدة مش مجرد أرقام .. لكن بتفتح أبواب كتير لزيادة إنتاج الغاز .. وبفضل التعاون مع الشريك الأمريكي شركة أباتشي .. وتطبيق حوافز تعديل الأسعار الجديدة .. إنتاج شركة خالدة للغاز هيوصل لأكتر من 480 مليون قدم مكعب غاز .. وفي القريب العاجل هيترفع لـ 500 مليون قدم مكعب.

ولفت التقرير إن وزارة البترول أعلنت كمان عن طرح فرص استثمارية جديدة في 7 حقول في البحر المتوسط .. و6 مناطق استكشافية في خليج السويس والصحراء الغربية.