مشروع هيغير خريطة الاستثمار العقاري في مصر.. ايه الحكاية ومين اللي هينفذ المشروع وكام حجم استثماراته.. وازاي هيعزز سوق العقار الفاخر في مصر.. وأزاي هينعش خطة مصر في ملف تصدير العقار.

ملف الاستثمار من أهم الملفات اللي نجحت فيها الدولة المصرية بعد قرار تحرير سعر الصرف أو التعويم في مارس 2024 ودا كمان بعد الاشراف المباشر للرئيس السيسي على الملف المهم دا وتحوله لقاطرة الاقتصاد في مجالات كتير زي التصنيع والسياحة والتجارة والعقار وقدرت مصر تستقبل عشرات المليارات من الدولارات في الفترة من مارس 2024 لغاية دلوقتى وآخرها الاستثمارات الخليجية الضخمة من دول الخليج التلاتة السعودية وقطر والكويت بإجمالي 29 مليار دولار تقريبا ودا غير الاستثمارات الإماراتية اللي دخلت مصر من ساعة صفقة رأس الحكمة ولغاية دلوقتي وهي الاستثمارات الأضخم في تاريخ مصر.

وبعيدا عن الخليج العربي مصر استقبلت استثمارات تانية ضخمة من الصين وروسيا وأوروبا والعرب في منطقة اقتصادية قناة السويس واللي تخطت ال8 مليار دولار وكل يوم بيتم الاعلان عن صفقات من العيار التقيل ودا بسبب جاذبية السوق المصري للاستثمار وتحوله لمركز عالمي لجذب المليارات نتيجة المزايا الضخمة اللي وفرتها الدولة ممثلة في البنية الأساسية الحديثة زي المواني العملاقة واللوجستيات والطرق وكمان قرب مصر من الأسواق العالمية المهمة وعامل الاستقرار وانخفاض قيمة العملة المحلية وتوافر الأيدي العاملة الرخيصة والمدربة.

اخر الصفقات الضخمة اللي بيتم التفاوض عليها كانت إعلان شركة "LMD" للتطوير العقاري التابعة لشركة "لاند مارك" الإماراتية مع الحكومة المصرية لإطلاق مشروع سكني تجاري ضخم في القاهرة باستثمارات تتجاوز 4 مليار دولار، بحسب تصريحات حمد العبار، الشريك المدير لدى الشركة.. طبعا صفقة بالحجم دا واللي يتوصل قيمتها لنص قرص صندوق النقد الدولي لمصر هتعزز من قوة السوق العقاري المصري وهتعزز في نفس الوقت من قوة السوق ملف تصدير العقار الفاخر وتحقيق موارد دولارية كبيرة وفي نفس الوقت الصفقات اللي من النوع دا بتجذب استثمارات تانية من شركات عالمية لأن المشروعات الضخمة بتكون زي دعاية مجانية للسوق المصري وهعزز المنافسة بين شركات العقارات العربية والعالمية في السوق المصري.

العبار كشف على هامش المؤتمر العقاري الدولي في دبي عن مفاجآت من العيار التقيل لما قال إن الشركة بتستعد لإبرام  صفقتين جديدتين في الساحل الشمالي المصري بحلول الصيف الجاي وزيادة حجم استثماراتها واللي بتوصل حاليا لاكتر من 6 مليار دولار منها 5 مليار دولار بالسوق المصرية ومليار دولار تتوزع بين دبي وباقي الأسواق التي تتواجد فيها الشركة، وفق العبار يعني الشركة الإماراتية بتدفع بمعظم استثماراتها في السوق المصري .

وعشان نبقى عارفين مصر عندها خطط لاقتحام سوق تصدير العقار الفاخر العالمي وبدأ التفكير في دا بعد الاستثمارات الأجنبية والعربية في السوق المصري بعد مشروع رأس الحكمة الإماراتي وبعد مشروعات الساحل الشمالي بشكل عام والعلمين الجديدة والمدن الذكية اللي اتعملت.. ومعني تصدير العقار باختصار جذب المستثمر الأجنبى للاستثمار فى الأصول العقارية داخل الدولة بالعملة الأجنبية مقابل امتيازات معينة منها حق الإقامة أو الحصول على الجنسية له ولأسرته وفق شروط متباينة بين الدول... وحسب الخبراء تصدير العقار المصرى من المجالات اللى ممكن تحصل نقد اجنبي كبير للدولة المصرية في سوق عالمي حجمه 250 مليار دولار سنويا ومصر عندها الإمكانيات المتاحة اللي تخليها رقم مهم في السوق العالمي الواعد وتحقق موارد دولارية ضخمة.