الدهب ركب الصاروخ ومحدش قادر عليه.. ياتري لسه الدهب ملاذ آمن للاستثمار ولا ممكن تحصل أزمات مفاجئة وتحركات عكسية وسريعة في الأسعار.. وايه اللي هيحصل الأيام الجاية.

طبعا كلنا متابعين اللي بيحصل في سوق الدهب المصري والعالمي من ارتفاعات قياسية في الأسعار وعيار 21 كسر حاجز  ال5 آلاف جنيه بالمصنعية والضريبة لأول مرة في تاريخه والجنيه الدهب بقى ب40 ألف جنيه مرة واحدة ودا نقدر نقول إنه تسونامي أسعار الصاغة مشفتهوش في تاريخها.

السؤال الأهم بقي دلوقتي هل الدهب مكمل في سكة الارتفاع ولا هيرجع تاتي؟
للاسف الشديد الدهب لسه هيستمر في الصعود وهيوصل لمستويات قياسية جديدة في مصر والعالم لان الأسباب اللي رفعت الاسعار لسه موجوده وكمان بتطور اكتر خاصة في مجال الصراعات العالمية التجارية ودا رفع سعره في البورصة العالمية ودا مكمل صعود طول طالما ترامب مستمر في قراراته العنترية وسياسته الكارثية سواء عن طريق فرض الرسوم الجمركية او حربه على الفيدرالي وغيره ودا خلق نوع من الفوضى والحذر في الأسواق العالمية.

وكمان المفروض النهاردة هنشوف اجتماعات في البنوك عشان تخفيض سعر الفائدة على الشهادات بعد خفض البنك المركزي الفائدة والبداية كانت إعلان البنك التجاري الدولي تخفيض الفايدة على شهادات العائد المرتفع وبالتالي هيكون في سيوله كبيرة هتخرج من الشهادات دي وتروح للاستثمار في الدهب ودا هيمثل عامل جديد لارتفاع الأسعار وفق العرض والطلب في الأيام الجاية.

طيب اسعار الدهب ممكن ترجع تاني تنزل بنسب كبيرة؟
طبعا دا مش هيحصل لأن الدهب مش بينزل بنفس الوتيرة اللي بيطلع بيها وعشان كده الدهب هو دايما الاستثمار الافضل لاصحاب المدخرات والسيولة وشفنا لما الدهب زاد السنة اللي فاتت كان سعر الأوقية عالميا مستقر.. وكان السبب الرئيسي بيرجع لعوامل داخلية في مصر وهي أزمة سعر الدولار ولما تم تحرير سعر الصرف ووصل الدولار لحوالي 45 جنيه كان طبيعي يحصل هبوط كبير في الدهب بسبب الفرق الكبير بين السعر قبل التعويم وبعده.. ودا شفناه لما عيار 21 الأكتر مبيعا انخفض من 4000 إلى 3100 جنيه في شهرين ودا مش هيحصل دلوقتي لأن سعر الدولار في مصر مستقر وبينزل كمان.

طيب هل الوقت الحالي مناسب للشراء
خبراء الصاغة فجروا مفاجأة لما نصحوا بعدم الاستثمار في الدهب دلوقتي أو الشراء وقالوا إن دي مخاطرة كبيرة خاصة أن السعر كبير كدا ووارد يحصل تصحيح بس مش بالشكل المتوقع وعشان كده شايفين ان الشراء في المستويات السعرية دي مخاطرة والافضل استثمار الفلوس في انواع تانية من الاستثمار زي العقار أو تجديد استثمارها في شهادات الادخار بالبنوك حتي لو فائدتها قلت لكن الفلوس هتفضل في الأمان وبتزيد من غير مجهود أو مخاطرة.