يا ترى ايه اللى بيحصل في سوق الصاغة؟ وازاى الدهب سعره وصل ل 5 الاف جنيه بالسرعة دي ؟ وهل الارتفاعات الأخيرة هتكمل ولا الدنيا رايحة على فين بالظبط؟ 

في الساعات اللي فاتت اسعار الدهب في السوق المحلي وصلت لرقم قياسي بالوصول لـ4900 جنية لجرام 21 واللي هو الاكثر مبيعا  في الاسواق المصرية خصوصا في القري والمحافظات، وده طرح اسئلة كتيرة عند الناس اهمهم اية اللي خلي اسعار الذهب ارتفعت للرقم ده، والاسعار هتفضل تطلع كده لحد أمتي، وهل مفيش امل أن الاسعار ترجع علي الاقل للأرقام المعقولة والسعر الحقيقي للجرام.

وقبل ما تدخل دوامه كبيرة من الاسئلة اللي ملهاش أول من آخر لازم نعرف أن في اكثر من سبب للزيادات الأخيرة لأسعار الذهب في السوق المحلي أول سعر الصرف والقرار الأخيرة للبنك المركزي بخفض اسعار الفايدة ، والقرار ده كان سبب في وجود اقبال كبير من الناس علي شراء الذهب وده للناس اللي بتدور علي مجال امن للاستثمار.

والذهب هو أول المجالات الجاذبة للاستثمارات في الوقت الحالي خصوصا أن سهل الاستثمار فيه واللي ممكن يبدأ من جرام واحد ويرتفع وفقا للسيولة المالية الموجودة مع العملاء، ده غير أن سهل في بيعه وتحويله لفلوس عكس العقارات واللي هيا ابرز القطاعات المنافسة للذهب واللي بتحتاج لوقت طويل للوصول للمشتري والسعر المستهدف من البيع، ده غير ان سوق العقارات في مصر بيعاني من فقاعة عقارية وانخفاض في حالة البيع والشراء بشكل عام بسبب أن العقارات المعروضة مطلوب فيها سعر اعلي بكتير من سعرها الحقيقي.

" title="ليلة صعبة في الصاغة..إيه اللي بيحصل في سوق الدهب والأسعار رايحة على فين؟" frameborder="0">

تاني سبب لارتفاع اسعار الذهب في السوق المحلي في مصر هيا التوترات الاقتصادية الكتيرة اللي منتشرة في العالم كله واللي السبب الرئيسي فيها الرئيس الأمريكي دونالد ترامب بفرضه للرسوم الجمركية الأخيرة واللي عملت ازمة في حركة التجارية وعملت ربكة كبيرة في البورصة العالمية وكانت سبب اساسي في ارتفاع اسعار المعدن الإصفر وارتفعت سعر الأونصة في السوق العالمي لأكثر من 3400 دولار، وكل التوقعات بتقول أن الاسعار هتكمل ارتفاعاتها في الفترة اللي جاية بسبب استمرار وتيره التوترات الاقتصادية العالمية، ده غير التوقعات اللي بتاكد أن البنك المركزي هيستمر في سياساته الجديدة بخفض اسعار الفايدة وبالتالي السوق المحلي للذهب هيشهد إقبال كبير من المواطنين للشراء وبالتالي الاسعار مرشحة وبكل قوة للزيادة.