يا ترى إيه اللي خلا الأموال الساخنة تكسر كل التوقعات وتفضل تتدفق على مصر حتى بعد ما البنك المركزي خفّض الفايدة؟ وهل فيه سر ورا الإقبال ده ولا المستثمرين الأجانب شايفين حاجة إحنا مش شايفينها؟ وايه أهمية الأموال الساخنة لمصر فى الوقت ده؟

الأموال الساخنة لسه مكملة تدفق على مصر رغم إن البنك المركزي المصري خفّض الفايدة لأول مرة من 5 سنين .. حاليا الفايدة نقصت بـ 225 نقطة أساس  يعني عائد الإيداع بقى 25% والإقراض 26% .. ومع كده الأجانب اشتروا أدوات دين حكومية بـ 71 مليون دولار في أول يوم بعد القرار.

إيه بقى السر ورا ده؟
الفايدة العالية مش هي بس اللي كانت بتجذب المستثمرين الجانب .. الموضوع أكبر من كده .. المحللين الاقتصاديين في بنوك استثمار عالمية ومحلية قالوا إن الفايدة مش هي العامل الوحيد .. في حاجات تانية زي استقرار سعر الصرف .. المناخ الاستثماري .. ومخاطر الدولة بشكل عام .. يعني المستثمر الأجنبي مش بس بيبص على العائد .. ده بيبص على الصورة بشكل أكبر .. مصر بتقدمله إيه .. استقرار سياسي وجيوسياسي .. خطوات إصلاح اقتصادي قوية .. وتوقعات إيجابية إن التضخم هيقل الشهور الجاية.. فكل دي مؤشرات تخليه يحط فلوسه فى أدوات الدين الحكومية وهو مطمن.

ووفقا لكتير من خبراء الاقتصاد فالفايدة الحقيقية في مصر لسه جاذبة جدًا مقارنة بالأسواق الناشئة التانية .. يعني حتى لو الفايدة نقصت .. العائد لسه مغري .. والجنيه المصري متوقع يفضل متماسك الفترة الجاية .. وده بيدي ثقة للمستثمرين إنهم يحطوا فلوسهم في أدوات الدين .. مش بس كده كتير من الخبراء شايفين إن البنك المركزي ممكن يخفّض الفايدة تاني بنسبة 8% لحد آخر 2025 .. ومع كده التدفقات دي مش هتتأثر كتير.

طيب هو يعني أصلا  أموال ساخنة ؟

بص يا سيدي..  دي الفلوس اللي بتيجي من برا عشان تستفيد من فرصة اقتصادية معينة .. زي إن الفايدة تكون عالية أو سعر العملة يكون مناسب .. وعادةً بتبقى استثمارات قصيرة الأجل .. يعني المستثمر بيحط فلوسه في أذون خزانة أو سندات حكومية ويستنى العائد .. لكن اللي بيخلي مصر مختلفة إن المناخ الاستثماري عندنا بقى أقوى ..وتوقعات دخول استثمارات خليجية وأجنبية مباشرة لمصر بتدي ثقة كبيرة في سعر الصرف .. وده بيقلل مخاطر التقلبات اللي ممكن تخلّي المستثمر يخاف.

حتى لو بصينا على تركيا مثلًا .. الفايدة هناك أعلى بكتير من مصر .. لكن مصر بتتفوق باستقرارها الأمني والسياسي وخطواتها الاقتصادية القوية .. يعني المستثمر مش بس بيدورعلى الفلوس .. ده بيدور على الأمان والثقة إن فلوسه هتبقى في مكان مضمون
و فارق الفايدة بين الجنيه والدولار لسه مغري .. وحتى لو في مستثمرين قرروا يطلعوا بعد خفض الفايدة .. في غيرهم بيدخلوا يعوضوا .. وده لأن السوق المصري بقى فيه توازن .. التوترات الجيوسياسية هديت نسبيًا .. وفيه توقعات إيجابية إن الاقتصاد هيكمل في الطريق الصح.

اللى لازم تعرفوا ان مصر مش بس بتعتمد على الفايدة عشان تجذب الأموال الساخنة .. هي بتقدم حزمة متكاملة .. استقرار .. إصلاحات اقتصادية .. توقعات إيجابية .. وثقة في سعر الصرف .. كل ده بيخلي المستثمر الأجنبي يقول "أنا هحط فلوسي هنا"