الحكومة أعلنت عن خطة جديدة لفلترة المتقدمين لشقق الاسكان الاجتماعي لسكن لكل المصريين 5 والمرة دي مع الناس المرفوضين بسبب عدادات الكهرباء والغاز.. ياتري اية اللي هيحصل معاهم وازاي هيقدموا يظلموا علي القرارات 

الحكومة حاليا بتمارس أقصي درجات الشفافية مع الناس اللي قدمت لحجز شقق الاسكان الاجتماعي لسكن لكل المصريين 5 واللي هو واحد من أكبر مشاريع الإسكان اللي بتشغل بال ناس كتيرة جدا وكان إليه اقبال كبير جدا من المصريين ووصل إجمالي الناس اللي تقدموا للحجز في الاعلان الجديد لأكثر من نصف مليون مواطن بيتنافسوا علي ما يقرب من 79 الف شقة، والحكومة أعلنت انطباق الشروط علي اكثر من 290 الف مواطن ورفض وأكثر من 300 الف مواطن.

مبدا الشفافية اللي الحكومة بتطبيقه لاختيار الفائزين بقرعة الإسكان الاجتماعي تضمن لاول مرة رفض عدد كبير من المواطنين بسبب امتلاكهم لعدادات كهرباء أو عدادات غاز طبيعي وده لاول مرة تحصل في تاريخ الاسكان الاجتماعي وكل الاعلانات اللي فاتت قبل كده مفيش في مرة الوزارة رفضت مواطن بسبب وجود عدادات كهرباء أو غاز طبيعي علي اسمه .

وزارة الإسكان والمجتمعات العمرانية ممثلة في صندوق الاسكان الاجتماعي ودعم التطوير العقاري أعلن عن فتح باب التظلمات لكل المواطنين الغير منطبق عليهم شروط الاعلان ولمدة شهر بدأت يوم 23 ماري اللي فات وانتهت يوم 24 من شهر أبريل الجاري، لكن فترة التظلمات شهدت أزمة كبيرة جدا وهيا أن الوزارة اكتشفت أن في ناس كتير من المقروضين عدادات كهرباء أو غاز طبيعي في محافظات تانية غير محل سكنهم الموجود في بطاقة الرقم القومي، ووجود عدادات علي اسم المتقدمين لحجز شقق الاسكان الاجتماعي معناه أنهم عندهم شقق سكنيه وبالتالي هما مخالفين لشروط الاعلان خصوصا أن الشفق دي مخصصة للناس اللي معندناش شقق سكنية.

وعلشان الحكومة ممثلة في وزارة الإسكان والمجتمعات العمرانية تطبق أقصي درجات الشفافية، فالحكومة قررت فتح باب التظلمات وتفتح الباب من جديد للناس لكن الفترة دي مخصصة للناس اللي عندهم رفض بسبب وجود العدادات، وفترة التقديم هتبدا من يوم 4 الي يوم 18 من شهر مايو اللي جاي، وهيكون التعامل من علي المستوي الوزاري بمعني أن وزارة الإسكان هتعمل رصد لكل الناس المرفوضين بسبب عدادات الكهرباء وهتبعتهم لوزارة الكهرباء علشان تتاكد من وجود عدادات علي اسمهم أو لا ونفس الأمر هيتكرر مع الناس اللي عندها عدادات غاز طبيعي، خصوصا أن الوزارة اكتشفت أن في ناس قدمت إفادات أنها معندهاش عدادات كهرباء أو غاز في محل سكنهم الموجود في بطاقة الرقم القومي ولهم والفحص أثبت أنه عدادات كهرباء في محل إقامة في محافظات تانية .

قرار الحكومة بمد فترة التظلمات بياكد أن الحكومة حريصة علي كل مواطن أن ياخذ حقه زي ما الكتاب بيقول، وان الناس اللي مستحقه للشقق السكنية هيا اللي تستفاد من برامج الإسكان الاجتماعي، وده جاي في إطار المبادرة الرئاسية سكن لكل المصريين واللي بتستهدف توفير سكن ملائم للمواطنين من محدودي الدخل.