دلوقتي الحكومة المصرية بترحب بكل مستثمر سواء عربي او اجنبي عشان كده سهلت عليهم إجراءات كتير وعملت لهم امتيازات أكتر عشان يشتغلوا بدون عراقيل.
طب لو أنت مستثمر أجنبي وعايز تقيم في مصر وتنفذ مشروعك.. تعمل إيه؟
بص يا سيدي، دلوقتي قانون الاستثمار رقم 72 لسنة 2017، حدد عدد من الشروط والضوابط اللي لازم تتوفر في حضرتك، عشان الحكومة تقدر تمنح المستثمرين الأجانب الإقامة داخل مصر، ومن أهمها إن الإقامة تكون لمدة سنة، وتبدأ من تاريخ تأسيس الشركة، وتتجدد عن طريق تقديم طلب.
كمان من شروط وضوابط إقامة المستثمرين، وفقًا للهيئة العامة للاستثمار والمناطق الحرة، إنه يعمل تأشيرة دخول المستثمرين، وكمان يستخرج توصية إقامة سنة أو إقامة خماسية، ومفترض إن التوصية دي بتتجدد كل شوية.
وبعد كل الإجراءات دي، فالمستثمر بيحصل على مجموعة من الخدمات، واللي هي إن الحكومة بتكفل له معاملة مماثلة زي المستثمر الوطني، كمان بتديه إقامة فى جمهورية مصر العربية طوال مدة المشروع، ومن هنا بيكون للمستثمر الحق فى إنشاء وإقامة المشروع الاستثماري وتوسيعه، وتمويله من الخارج بدون قيود وبالعملة الأجنبية.
كمان، بيكون من حقه تملك المشروع وإدارته واستخدامه والتصرف فيه وجنى أرباحه وتحويلها إلى الخارج وتصفية المشروع وده بدون الإخلال بحقوق الغير.
ضيف على كل ده، إن الحكومة بتسمح له بإتاحة جميع عمليات التحويل النقدي المتصل بالاستثمار الاجنبي بحرية، وبعملة قابلة للتحويل الحر، ومش بس كده لأ ده كمان بتسمح له بتحويل العملة المحلية إلي عملة قابلة للاستخدام بحرية وبدون تأخير.
ودي كانت إجراءات تحفيزية من الحكومة للمستثمرين.
0 تعليق