يا ترى لو معاك فلوس أو تحويشة العمر تتصرف إزاي عشان تحافظ عليها وفي نفس الوقت تزودها، يعني باختصار تحط فلوسك في أي وعاء إدخاري يضمن لك تحقيق مكسب مستمر وتبدأ منين بالظبط.

طبعا، كلنا شوفنا وتابعنا الحرب التجارية اللي حصلت بين أمريكا والصين الفترة الأخيرة، بسب الرسوم الجمركية اللي فرضها الرئيس الأمريكي دونالد ترامب على كل دول العالم، وكان لبكين الحظ الأكبر فيها، ولكن رغم كده كل العالم اتأثر بالأزمة دي حتى الاقتصاد الأمريكي نفسه وكبار رجال الأعمال هناك، اللي خسروا فلوس بتريليونات الدولارات.

عشان كده مع أي أزمة اقتصادية بتحصل، الكل بيفكر في فلوسه أو في تحويشة العمر، إزاي أحافظ عليها وفي نفس الوقت أكبرها، احنا بقى هنقولك تعمل إيه؟

بص يا سيدي، أغلب الخبراء أجمعوا على انك لازم تتسلح ب 3 حاجات مهمة ، هي السيولة والأصل العقاري وكمان الدهب.

والكلام ده معناه، إن الاحتفاظ بسيولة تعادل 6 أشهر من المصاريف هيوفر لك شبكة أمان عند الأزمات، كمان شراء العقارات هيقدر يديك الاستقرار، والدهب مخزن مهم للفلوس وملاذ آمن للاستثمار خاصة وأنه رجع يتربع على عرش الملاذات الآمنة، مدعوم بطلب عالمي غير مسبوق، وتوقعات بملامسة 3700 دولار للأونصة بنهاية السنة دي 2025، لكن حتى الدهب، فيُنصح بالتعامل معاه بذكاء، عن طريق الشراء المنتظم بنسب صغيرة مش دفعة واحدة.

وفي ظل تراجع الثقة بالنظام المالي العالمي، وهيمنة الدولار، ممكن الوقت الحالي يكون مناسب لإعادة بناء المحافظ الاستثمارية بعقلانية ومرونة.

ومن هنا، لازم بردو تتسلح بشوية حاجات عشان تقدر تواجه أي تحديات محتملة، واللي أولها انك تمتلك أصل عقاري، يعني شقة أو بيت عشان يوفر لك استقرار بغض النظر عن الظروف الاقتصادية.

كمان، لازم تحافظ على وظيفتك، لأن في أوقات الأزمات، بيكون الاستقرار الوظيفي أولوية قصوى، وبرضو حاول تدور على مصادر دخل إضافية، يعني مثلا لز عندك  فكرة مشروع صغير مش هيحتاج استثمار كبير وهيقدر يوفر بك دخل إضافي، فدي ميزة كبيرة.

وخليك عارف، إن العالم بالفعل بيواجه أزمة اقتصادية عالمية، لأن  التوترات المتصاعدة في مناطق مختلفة زي تايوان والصين، وأزمة روسيا وأوكرانيا، وقضايا الشرق الأوسط، بالإضافة للحرب التجارية اللي أشعلتها أمريكا أثرت بشكل سلبي على الاقتصاد وفرص العمل.

ولكن نقدر نقولك دلوقتي إن إدخار الدهب أو الاستثمار فيه، هو أفضل الحلول خاصة في ظل الضبابية الاقتصادية العالمية، خاصة وإن المعدن الأصفر بيشهد إقبال كبير كملاذ آمن،وارتفعت مشتريات العالم منه خلال الشهور الثلاثة الأولى من السنة دي بمستويات غير مسبوقة منذ 2016، وكان جزء كبير من الطلب عليه بهدف الاستثمار.

وحاليا، في بنوك استثمارية كبيرة زي جولدمان ساكس، بتأكد إن الدهب هو الخيار الأمثل للتحوط من أي ركود اقتصادي قادم، وبتتوقع إن سعره ممكن يوصل ل 3700 دولار بنهاية السنة دي، وفي ناس تانية زي ستيت ستريت بتتوقع إعادة تشكيل الاقتصاد العالمي واللي ممكن ثدفع أسعار الدهب لما بين 4000 و 5000 دولار في السنين القليلة الجاية.. عشان كده، خليك ذكي وحافظ على تحويشة عمرك بأفضل وسيلة استثمار.