ليه سلطنة عمان اختارت مجموعة طلعت مصطفى بالذات عشان تنفذ واحد من اكبر المشروعات العقارية فى السلطنة؟ وإزاي مشروع جديد هناك هيغير خريطة الاستثمار العقاري والسياحي في الخليج؟ وإيه معنى إن القطاع الخاص المصري يدخل بقوة في أسواق عربية زي كده؟.. وليه الدول العربية بقت بتدي طلعت مصطفى مشروعات بالمليارات؟

النهاردة بنتكلم عن إنجاز جديد لمجموعة طلعت مصطفى .. الشركة المصرية اللي بقت رمز في التطوير العقاري والسياحي .. وقّعت مؤخرا اتفاقية مع وزارة الإسكان والتخطيط العمراني العمانية .. عشان تطور مشروعين كبار في غرب العاصمة مسقط .. واحد عقاري والتاني سياحي .. باستثمارات بتوصل لـ1.5 مليار ريال عماني .. يعني حوالي 3.9 مليار دولار.

أول مشروع هو مدينة سكنية ذكية في مدينة السلطان هيثم .. على مساحة 2.7 مليون متر مربع .. زي مدينتي في مصر كده .. مدينة متكاملة فيها كل حاجة .. فيلات وشقق بأنواع مختلفة .. نادي اجتماعي رياضي على 190 ألف متر مربع .. مناطق تجارية وخدمية على 140 ألف متر مربع .. والأهم إن المشروع ده قريب من مطار مسقط بدقايق .. يعني موقع استراتيجي فعلا.

المشروع التاني سياحي عالمي في منطقة الشخاخيط الساحلية .. على مساحة 2.2 مليون متر مربع .. وده مشروع على خليج عمان مباشرة .. بواجهة شاطئية 1760 متر .. فيه مارينا لليخوت .. فندق سياحي فخم .. فيلات بإطلالات على البحر .. شقق وكبائن .. وكمان حديقة النسيم التراثية الترفيهية على 215 ألف متر مربع.. مساحات خضرا بتدي إحساس بالراحة والتميز.

المشروعين دول هيوفروا حوالي 13 ألف وحدة سكنية وفندقية.. وهيتربطوا ببعض بقطار كهربائي.. يعني تكامل على مستوى عالمي.. ومش بس كده.. المشروعين فيهم خدمات شاملة.. من مساجد ومستشفيات لنوادي رياضية ومناطق ترفيهية وتجارية.. وكل ده بيشتغل بتقنيات ذكية عشان يضمن جودة حياة عالية.. وفوق كل ده.. أكتر من 50% من المساحة الإجمالية للمشروعين هتبقى مساحات خضرا ومناطق مفتوحة

طب ليه عمان اختارت طلعت مصطفى تحديداً؟

الإجابة ببساطة في السمعة والتاريخ.. مجموعة طلعت مصطفى عندها خبرة 55 سنة في بناء مدن متكاملة زي مدينتي والرحاب ونور في مصر.. ومؤخراً ساوث ميد في الساحل الشمالي.. ومدينة بنان في السعودية.. اللي هي أول محطة ليهم برا مصر على مساحة 10 مليون متر مربع.. المجموعة دي بتشتغل بمعايير عالمية.. وعندها محفظة أراضي في مصر بتتجاوز 107 مليون متر مربع.. ومبيعاتها العقارية كسرت حاجز التريليون جنيه .. وده إنجاز غير مسبوق في مصر .. كمان عندها قاعدة عملاء تتخطى 200 ألف عميل .. ومشروعاتها بتستوعب أكتر من 1.5 مليون نسمة.

مش بس كده.. طلعت مصطفى بتمتاز في قطاع السياحة.. فنادق زي فورسيزونز في شرم الشيخ والقاهرة والإسكندرية.. وكمبينسكي النيل.. ودلوقتي بيجددوا 7 فنادق تاريخية في مصر .. زي سوفيتيل أولد كتراكت في أسوان وماريوت مينا هاوس في القاهرة.. وكمان بيبنوا أول فندق فورسيزونز في الساحل الشمالي.

النجاح ده خلّى الدول العربية زي السعودية وعمان يثقوا في طلعت مصطفى .. ليه؟

عشان بيوفروا جودة عالمية بأسعار تنافسية .. وبيشتغلوا بنظام ذكي بيوفر في الطاقة والمياه .. وكمان بيستخدموا تكنولوجيا زي الذكاء الاصطناعي في إدارة المشروعات .. ده غير إن نجاحهم في السعودية مع مشروع بنان خلّاهم يثبتوا إنهم قادرين ينافسوا عالمياً.

وده بيفتح سوق ضخم للقطاع الخاص المصري .. لما شركة مصرية زي طلعت مصطفى بتوصل لمستوى إنها تاخد مشروعات بمليارات في دول زي عمان والسعودية.. ده بيثبت إن الشركات المصرية قادرة تكون لاعب أساسي في السوق العربي .. وبيخلّي دول تانية تبص للخبرة المصرية باحترام .. يعني فرص استثمارية جديدة وتدفقات دولارية بتدعم الاقتصاد المصري.