يا ترى إيه اللي بيحصل في سوق الدهب، وليه الأسعار بتتحرك بالشكل الغريب ده، وهل ممكن السعر يطلع تاني الفترة الجاية ولا هيبدأ يهدى، وإيه علاقة الدهب بتقرير التضخم في أمريكا؟

انهاردة، الدهب العالمي رجع يطلع تاني، وده بسبب حاله من الترقب والتركيز في السوق العالمي، وخاصة مع الإعلان عن بيانات التضخم الأمريكي اللي اكيد هتعمل قلبان.

وحاليا، كتير مركزين على مؤشر أسعار المستهلك في أمريكا، لأن الرقم ده هو اللي بيحدد البوصلة، فلو التضخم طلع أعلى من المتوقع، الفيدرالي الأمريكي ممكن يرفع الفايدة تاني وساعتها الدهب ممكن يهدى شوية لان المستثمرين بيسحبوا فلوسهم من الدهب ويحطوها في الشهادات، لكن لو التضخم فضل تحت السيطرة فساعتها ممكن نشوف الدهب بيرتفع من تاني.

وفي الساعات الأخيرة، سجلت أونصة الدهب 3348 دولار، وده من أعلى مستويات ليها، بعدما كانت في بداية اليوم على 3322 دولار، ودي قفزة مش قليلة، بسبب القلق من حكم محكمة أمريكية خلى الرسوم الجمركية اللي فرضها ترامب زمان تفضل مستمرة، يعني الحرب التجارية لسه ما خلصتش.

كمان، من ناحية تانية أمريكا والصين أعلنوا عن اتفاق مبدئي لهدنة تجارية، وقالوا إنهم ناويين يخففوا القيود، لكن لسه القرار محتاج موافقة ترامب والرئيس الصيني، يعني الموضوع لسه مش محسوم لحد دلوقتي.

والكلام دع معناه إن السوق مترقب، والمستثمرين بيشتروا دهب كملاذ آمن وسط التوترات دي.

أما بقى عندنا فب مصر، فالدهب لسه في ماشي بشكل طبيعي، وده بسبب إن السعر العالمي متذبذب، وكمان سعر الدولار شبه مستقر، وسجل عيار 21، اللي هو أكتر حاجة الناس بتشتريها،  4670 جنيه للجرام، وبيتحرك حوالين الرقم ده من غير تغييرات كبيرة.

طب لو عايز تشتري او تبيع.. تعمل إيه؟ 
بص يا سيدي، القرار بيرجع لمدى استقرار التضخم في أمريكا، ولو البيانات طلعت أقل من المتوقع، ممكن نشوف الدهب بيطلع تاني ويوصل ل 3600 دولار للأونصة نهاية السنة، يعني لوو ناوي تشتري للادخار الطويل، ممكن تستغل أي هدوء مؤقت في الأسعار، لكن لو ناوي تشتري وتبيع على المدى القصير، فخليك مراقب بيانات التضخم الأمريكية، لأن دي اللي هترسم اتجاه السوق.

وفي النهاية، نقدر نقولك إن الدهب مش بس بيتأثر بالسوق المحلي، ده بيتأثر باللي بيحصل في أمريكا والصين والبنوك المركزية، وأي خبر صغير ممكن يخلي الأسعار تطلع أو تنزل.