التسوق أونلاين بقى جزء من حياتنا. بس للأسف معاه زادت عمليات النصب والاحتيال. ناس كتير اتعرضت لمواقف مؤلمة لمجرد إنهم اشتروا من موقع مش مضمون أو صدقوا إعلان كاذب.
أكتر أنواع النصب المنتشرة هو إنك تشتري حاجة وتوصلك حاجة تانية خالص أو ما توصلكش أصلاً. في مواقع بتعرض منتجات بأسعار مغرية جدًا وتقولك "عروض لفترة محدودة". لكن بعد ما تدفع لا في منتج ولا في رد. أو ياخد منك ديبوزت أو مقدم بنص المبلغ أو كله في بعض الأوقات وبعد كده ميبقاش في أي رد.
كمان في حاجة اسمها احتيال المزادات ودي بتحصل على مواقع بتعرض مزادات على سلع نادرة أو بأسعار قليلة. تلاقي نفسك بتزايد وتفوز وتدفع وبعدين تكتشف إن المنتج مش موجود من الأساس أو البائع اختفى.
ومن أكتر الحيل الشائعة كمان بيع السلع المقلدة. تشتري موبايل أو برفان أو شنطة براند وتتفاجئ إنها تقليد ومتستاهلش حتى ربع التمن.
أما في المعاملات فالمحتالين ممكن يبعتولك لينك دفع شكله رسمي بس هو مزيف. وبيسرق بياناتك البنكية أول ما تدخلها.
نصايح مهمة تحميك. اتأكد إنك بتشتري من مواقع معروفة وآمنة (دور على https مش http). اقرا تقييمات الناس. خصوصًا لو البائع جديد أو السعر مغري جدا.
ابعد عن الدفع المباشر واستخدم طرق دفع فيها حماية للمشتري. لو لقيت إعلان شكله "حلو بزيادة" غالبًا فيه حاجة غلط. اللي بيغريك بالسعر ممكن يكون بيغشك في المنتج خليك واعي واتسوق بأمان.
0 تعليق