الدولار سعره زاد بشكل ملحوظ خلال الأسبوع اللي فات وزاد تقريبا بحوالي 37 قرش على مدار الأسبوع اللي بيبدأ الأحد وينتهي الخميس في البنوك ودا خلي فيه كلام كتير يتقال عن تعويم جديد وإن الدولار في الطالع.. لكن الحقيقة فين.. تعالوا نشوف إيه الحكاية في الفيديو ده خليكم معانا للآخر.

زي ما تابعنا على مدار الأيام اللي فاتت ازاي سعر الدولار رفع ووصل الي 49.37 جنيه في بعض البنوك ودا بعد فترة من الاستقرار والنزول في سعر العملة الأمريكية والتطور الاخير في الأسعار بيقول إن فيه حاجة حصلت في سوق الصرف ودا خلي الصفحات اياها تروج لاخبار إن فيه تعويم جديد جاي في سعر الدولار وإن الجنيه هينزل تاني وقالوا إن دي شروط صندوق النقد الدولي قبل المراجعة الرابعة اللي مصر مستنية نتيجتها دلوقتى..

طبعا الكلام دا ملهوش أساس من المنطق ولا الصحة وأن وتيرة ارتفاع الدولار على مدار الأيام اللي فاتت بتقول إن سعره بيحدده العرض والطلب وإن مفيش أي تحكم في السعر وبالتالي مفيش حاجة اسمها تعويم والسعر حر ودا اللي قاله صندوق النقد الدولي في تقريره الأخير لما أكد إن سعر الدولار في مصر بيخضع لقانون العرض والطلب ومن غير اي تحكمات من المركزي لكن في نفس الوقت فيه أسباب لزيادة أسعار الدولار أو انخفاضها ودي بتبقي أسباب طبيعية وأسباب تانية ليها علاقة بالقرارات اللي بتعلنها الحكومة مثلا أو المؤسسات الدولية زي على سبيل المثال قرار البنك المركزي بإعادة استيراد السلع المستفزة وبينها السيارات فطبيعي قرار زي دا يرفع الطلب على الدولار عشان المستوردين يرجعوا يشتروا السلع دي من الخارج وطبيعي بردو سعره يزيد ومثلا مصر هتسدد دفعات كبيرة من الديون الخارجية خلال نوفمبر فطبيعي يكون فيه طلب على الدولار والحكاية في الأول والآخر بيحكمها عرض وطلب زي ما قلنا.

يعني مفيش أزمة في الدولار ولا تعويم ؟
لا مفيش أزمات لأن مصر حققت تدفقات دولارية غير مسبوقة في تاريخها ودا رغم الأزمات اللي حوليها ودا اللي قالته وكالة فيتش للتصنيف الائتماني وصندوق النقد الدولي في الأيام اللي فاتت إن مصر قدرت تدبر مبالغ ضخمة من العملة الأمريكية عن طريق الاستثمارات المباشرة وغير المباشرة وترفع وتعظم مواردها من الدولار ودا خلي فيه حالة استقرار كبير في سوق الصرف .

طيب التوقعات بتقول ايه وسعر الدولار رايح على فين الأيام الجاية ؟
زي ما قلنا لحضراتكم الموضوع عرض وطلب ومؤشرات اقتصادية وغير كده متصدقش اي حد يقولك يعرف سعر الدولار هيوصل كام بكرة.. يعني لو استمر الطلب على الدولار سعره هيزيد في الاسبوع الجاي ولو الطلب قل سعره هيرجع ينزل تاني ودا غير كمان إن المؤشرات الاقتصادية التانية بيكون ليها  دور في تحديد السعر زي  مثلا انخفاض قيمة الديون الخارجية ودا معناه أن مصر هتوفر مليارات الدولارات وكمان زي انخفاض قيمة فاتورة الاستيراد ودا معناه أن الحكومة هتوفر مليارات تانية وزي ارتفاع إنتاج المواد البترولية واللي معناه إن مصر هتوفر مليارات الدولارات من استيرادها وهكذا بقية مؤشرات الاقتصاد.