يا ترى صادرات مصر من الصناعات الغذائية وصلت لفين دلوقتي، وايه هي أهم الأسواق اللي دخلتها خلال الفترة الأخيرة، وهل أرقام الصادرات دي مرشحة للزيادة في الفترة الجاية ولا إيه اللي هيحصل.. هنقولك كل التفاصيل في التقرير ده فتابعنا للآخر.
في الساعات الأخيرة، أعلن رئيس المجلس التصديري للصناعات الغذائية، أن صادرات الصناعات الغذائية في 9 شهور بس، وتحديدا من يناير لحد سبتمبر من سنة 2024، سجلت 4.6 مليار دولار، وبكده تكون محققة نسبة نمو 18%.
وكمان سجلت قيمة نمو 688 مليون دولار مقارنة بصادرات نفس الفترة من سنة 2023، اللي بلغت 3.9 مليار دولار.
وبتعتبر صادرات التسع شهور دي، هي أعلى قيمة صادرات وأكبر نسبة نمو يحققها القطاع خلال الفترة دي مقارنة بالبيانات التاريخية المسجلة.
ونقدر نقول إن صادرات مصر من منتجات الصناعات الغذائية، للدول العربية كانت في المقدمة، ووصلت قيمتها ل 2405 مليون دولار، وبتمثل 52% من إجمالي الصادرات الغذائية، وكمان حققت نسبة نمو 12%.
وبعد الدول العربية، صادراتنا من الصناعات الغذائية، اقتحمت دول الاتحاد الأوروبي، ووصلت قيمتها ل953 مليون دولار بنسبة نمو 42%، وبتمثل 21% من إجمالي الصادرات.
أما بالنسبة للسوق الأفريقي، فصادرتنا وصلت للدول الأفريقية غير العربية بقوة، وسجلت قيمة 371 مليون دولار وبتمثل 8% من إجمالي الصادرات، وكمان حققت نسبة نمو في قيمة الصادرات بلغت 14%.
نيجي لأسواق الولايات المتحدة الأمريكية، فزادت صادراتنا في الأسواق دي بقيمة 249 مليون دولار وبتمثل 5% من إجمالي الصادرات، وحققت نسبة نمو بلغت 37%.
ضيف على كده، إن باقي المجموعات الدولية بلغت قيمة صادراتنا من الصناعات الغذائية ليها، 641 مليون دولار، واللي بتمثل 14% من إجمالي الصادرات الغذائية المصرية خلال نفس الفترة، محققة نسبة نمو 7%.
وبخصوص أهم دول العالم المستوردة للصناعات الغذائية من مصر، فهي المملكة العربية السعودية في المركز الأول بقيمة صادرات 353 مليون دولار بنسبة نمو قدرها 15%، يليها السودان بقيمة 306 مليون دولار ونسبة تراجع 25%.
وبعد كده، بتيجي أمريكا بقيمة 249 مليون دولار ونسبة نمو 37%، ثم فلسطين بقيمة 245 مليون دولار ونسبة نمو 23%، ثم ليبيا بقيمة 234 مليون دولار ونسبة نمو 19%، ثم هولندا بقيمة 212 مليون دولار محققة نسبة نمو 108%، يليها الاردن بقيمة 172 مليون دولار محققة نسبة نمو 19%، والمغرب بقيمة 162 مليون دولار ونسبة نمو 98%.
بعد كده، بتيجي أسبانيا بقيمة 155 مليون دولار ونسبة نمو 75%، وفي المركز العاشر العراق بقيمة 141 مليون دولار ونسبة نمو 5% بالمقارنة بصادرات نفس الفترة من سنة 2023.
وطبعا الكلام ده مؤشر إيجابي جدا، بيأكد أن مصر في الصادرات الزراعية ما بتهزرش، وقادرة تقتحم كل الأسواق العالمية وبتجذب العملة الصعبة بالدولار واليورو وكل العملات الدولية، وكل ده طبعا بينعكس بالإيجاب على مؤشرات الاقتصاد المحلي وبيجلب الخير الكتير لبلدنا.
0 تعليق