يا ترى إيه اللي بيحصل لما البنوك بتاخد تصنيف أعلى من وكالات عالمية زي "فيتش"؟ إيه معنى إن تصنيف بنك زي البنك الأهلي أو بنك مصر يتم رفعه؟ وهل ده مجرد خبر اقتصادي ولا ليه تأثير حقيقي على حياتنا اليومية؟.. في الفيديو ده هنتكلم عن حاجة ممكن تغير شكل الاقتصاد المصري قدام العالم... حاجة بتأكد إن في خطوات إيجابية بتحصل، وإن الاقتصاد في طريقه للتحسن رغم التحديات.

وكالة "فيتش"، واحدة من أكبر وكالات التصنيف الائتماني في العالم، أعلنت مؤخرًا رفع التصنيف الائتماني لأربع بنوك مصرية كبرى.. البنوك دي هي البنك الأهلي المصري وبنك مصر وبنك القاهرة والبنك التجاري الدولي – مصر.. تصنيف الأربعة ارتفع من "-B" إلى "B". وده معناه ببساطة إن ثقة العالم في قدرة البنوك المصرية على مواجهة التحديات زادت وإن الوضع الاقتصادي بقى أكثر استقرار

طيب إيه اللي خلا وكالة فيتش تاخد القرار ده؟

في أكتر من سبب، أهمهم طبعا  زيادة السيولة بالعملات الأجنبية.. الحكومة المصرية قدرت توفر سيولة دولارية أكبر من خلال مجموعة اتفاقيات، زي اتفاقية رأس الحكمة، بالإضافة إلى حزمة الدعم من صندوق النقد الدولي… وده معناه إن البنوك بقت في وضع أفضل للتعامل مع احتياجات السوق بالعملة الصعبة.

كمان استثمارات الأجانب وتحويلات المصريين بالخارج.. لأن خول استثمارات جديدة من الأجانب سواء في أدوات الدين أو في السوق بالإضافة لتحويلات المصريين بالخارج ساعد بشكل كبير في تعزيز الاحتياطي النقدي.

وتالت حاجة الاستقرار الاقتصادي والنمو القوي.. وكالة فيتش أشارت إن الاقتصاد المصري بدأ يستقر أكتر والأسواق بتشهد معدلات نمو كويسة جدًا رغم التحديات العالمية

طب ده يأثر علينا إزاي؟

رفع التصنيف مش مجرد خبر يتنشر على صفحات الجرايد ده ليه تأثير مباشر وغير مباشر على الاقتصاد المصري وحياتنا.. وطبعا زيادة الثقة الدولية.. لأن لما البنوك المصرية تصنيفها يتحسن المستثمرين الأجانب بيحسوا إن التعامل مع السوق المصري أكتر أمانا وده معناه استثمارات جديدة وفرص عمل أكتر
كمان استقرار أسعار الصرف.. السيولة الدولارية بتساهم في استقرار سعر الجنيه المصري قدام العملات الأجنبية وده بيقلل الضغط على الأسعار ويأثر إيجابيًا على التضخم.. والبنوك بتقدر توفر تمويلات أكتر للشركات المحلية سواء كانت شركات كبيرة أو صغيرة وده بيزود الإنتاجية وبيخلق فرص شغل جديدة

والتصنيف الأعلى معناه إن الاقتصاد المصري بيتشاف برؤية أفضل قدام العالم.  وده مش بس بيجذب استثمارات، لكنه كمان بيحسن سمعة البلد ككل.

هل ده معناه إن كل التحديات انتهت؟

أكيد لأ.. رفع التصنيف خطوة إيجابيةلكنها بداية الطريق مصر لسه قدامها تحديات زي ارتفاع الأسعار وضبط معدلات التضخم واستمرار جذب الاستثمارات

الخلاصة.. رفع التصنيف الائتماني للبنوك المصرية من وكالة "فيتش" بيقول للعالم إن مصر على الطريق الصحيح ورغم التحديات في خطوات جدية لتحسين الوضع الاقتصادي.. لكن الكرة دلوقتي في ملعبنا، سواء الحكومة، القطاع الخاص، أو حتى المواطن العادي. إحنا كلنا جزء من رحلة تحسين اقتصادنا... وده اللي هيخلينا نقدر نعدي أي تحدي مهما كان كبير