اشتريت دهب وقالولك السعر هينزل وهتخسر فلوسك أو معاك فلوس وعرفت أن الدهب بينزل وهتخسر تحويشة العمر.. قبل ما تقرر هتعمل ايه في الحالتين.. شوف الفيديو ده الأول وبعدها هتقرر

 
أسعار الدهب في 2024 شهدت ارتفاعات قياسية غير مسبوقة بسبب عوامل كتير منها الصراعات الجيوسياسية في العالم واضطراب خطوط الملاحة والتجارة الدولية والاتجاه لخفض الفايدة الأمريكية بالتزامن مع زيادة الطلب على المعدن الأصفر من البنوك المركزية العالمية ودا وصل سعر الدهب عالميا لمستويات قياسية قربت في وقت من الأوقات على 2750 دولار لكن بعد فوز ترامب وإعلان سياسته المعروفة بدعم الدولار وتعهده بإنهاء الصراعات في المنطقة العربية وروسيا وأوكرانيا خلي سعر الدهب ينزل بشكل كبير في الأيام الأخيرة لكن طلعت توقعات تانية بتقول إن النزول دا مؤقت وإن الدهب راجع بقوة تاني وبنك جولدمان ساكس على سبيل المثال قال إن الدهب هيوصل 3 آلاف دولار في بداية 2025 وإنه هيستمر في الزيادة.

ناس كتير قالت إن توقعات جولدمان ساكس مبالغ فيها لكن بعد ساعات من صدور تقرير البنك العالمي الأسواق ردت وايدت كل توقعاته ورجعت أسعار المعدن الأصفر تزيد من تاني و النهاردة ارتفعت أسعار الدهب إلى أعلى مستوى لها في أسبوع، بدعم من تراجع الدولار الأميركي، في وقت تترقب الأسواق تصريحات مسؤولي الاحتياطي الفدرالي للحصول على إشارات حول مسار أسعار الفائدة الأميركية.
وصعد سعر الذهب في التعاملات الفورية بنسبة 0.40% ليصل إلى 2622.70 دولاراً للأونصة، ودا أعلى مستوى من 12 نوفمبر ودا بعد زيادة الأسعار  بنسبة 2% في تعاملات امبارح الاثنين وكمان ارتفعت العقود الآجلة للدهب في الولايات المتحدة بنسبة 0.49% إلى 2627.30 دولاراً للأونصة.

يعني السبب الرئيسي لارتفاع سعر الدهب هو تراجع الدولار الأميركي بعد موجة مكاسب قوية الأسبوع اللي فات وزي ما احنا عارفين إن العلاقة بينهم عكسية تماما وتراجع الدولار خفض من  تكلفة الدهب للمشترين من حاملي العملات التانية ودا اللي قاله "كايل رودا"، محلل الأسواق المالية في "كابيتال.كوم" .. كمان يفضل سعر الفايدة الأمريكية عامل مهم جدا في تحديد مصير اسعار الدهب واخر البيانات الاقتصادية القوية اثارت توقعات باستمرار تخفيض أسعار الفائدة من الاحتياطي الفدرالي واللي خفض الفايدة بمقدار 75 نقطة أساس منذ سبتمبر  والأسواق مستنية تصريحات مسؤولين في البنك، وسط توقعات السوق باحتمال خفض الفايدة بمقدار 25 نقطة أساس في ديسمبر اللي جاي بنسبة توقع 58.8%، مقابل 41.2% لاحتمال الإبقاء عليها دون تغيير ودا معناه طبعا ارتفاع سعر الدهب لأن المستثمرين هيغيروا اتجاه استثماراتهم من خفض الفايدة لنوع اخر من الاستثمار واللي عادة بيكون الدهب وهنا الطلب هيرجع يزيد عليه وبالتالي سعره هيرفع من تاني.

طيب إيه اللي هيحصل في الصاغة المصرية ؟
زي ما قلنا قبل كده إن سوق الدهب في مصر متربط بالسوق العالمي لان شركات الدهب والتجار بيتسوردو بالدولار والسعر العالمي بيكون ليه تأثير مباشر في تحديد سعر الدهب في مصر ودا معناه أن الأسعار في الصاغة المصرية هترجع ترفع من تاني وبشكل كبير جدا ودا اللي قلناه هنا في بانكير من فترة كبيرة فطبيعي لو معاك دهب حافظ عليه ومتبعش دلوقتي ولو معاك فلوس زيادة فالوقت مناسب جدا أنك تشتري وتستثمر وتكسب.