العجلة دارت ومصر خلاص عرفت طريق الاستثمارات الكبرى.. ايه الجديد في ملف الاستثمار وايه حكاية نبوءة الملياردير الشهير محمد العبار وايه قصة الـ90 مليار دولار اللي مصر حاطة عينيها عليها.. التفاصيل كلها هتلاقوها في التقرير ده خليكم معانا للآخر

 
في الاقتصاد واحد زائد واحد يساوي اتنين وفي لغة الأرقام والمكاسب والخسارة مفيش عواطف ولا مجاملات والسوق اللي هيقدم كل التسهيلات والامكانيات للمستثمرين هو اللي هتنزل عنده المليارات وغير كده يبقي كلام ملهوش فايدة ودا اللي حصل في مصر لما قررت تشتغل صح في ملف الاستثمار وكانت البداية أنها توفر كل اللي بيحتاجه المستثمر من بنية أساسية قوية في الطرق والمحاور والموانئ واللوجستيات والاتصالات وسوق الصرف المستقر ودا كله بخلاف الاستقرار الأمني والسياسي طبعا.

وقدرت مصر تعمل بنية أساسية هي الافضل والاحدث في المنطقة كلها وخدت ترتيب متقدم كمان على المستوى العالمي وبعد كده بدأت الحكومة في توفير كل اللي ممكن يحتاجه المستثمر وأصحاب رؤوس الأموال وأصحاب الشركات العالمية عشان يجو يستثمروا فلوسهم في السوق المصري وفعلا الحكاية بدأت بصفقة رأس الحكمة الأكبر والاضخم في مصر وبعدها عرفت البلد لأول مرة يعني ايه استثمارات ضخمة تحدث الفارق في السوق ودا شجعها أنها تكتشف اماكن تانية على غرار صفقة رأس الحكمة وتطرحها للمستثمرين وبالفعل الدولة طرحت مشروعات ضخمة ومناطق صناعية بطول الساحل الشمالي وحصل زي سباق من المستثمرين على المنطقة كلها .
وزي رأس الحكمة الحكومة لتجهيز تطرح مناطق تانية متقلش عن رأس الحكمة زي منطقة رأس بناس على ساحل البحر الأحمر واللي بتعتبر حتة من الجنة زي ما وصفها المستثمرين وهتكون فيها استثمارات تفوق اللي اتحطت في رأس الحكمة وغير رأس بناس مصر بتجهز أنها تطرح اماكن تانية في راس جميلة وشرم الشيخ والغردقة وجنوب سيناء وشمالها ودا مكنش هتيحقق لولا أن الملف دا تمت إدارته بطريقة علمية وتحت إشراف ورعاية ورئاسة الرئيس السيسي شخصيا بعد التخلص من كل الروتين وعقد الإجراءات اللي كانت بتعرقل اي استثمارات وتكره المستثمر في البلد وكنا بنسأل ليه المستثمرين بيطفشوا من مصر

الجديد في ملف الاستثمار هو اللي قاله الملياردير الامارايت محمد العبار، مؤسس شركة إعمار واللي قال إن شركته استثمرت 20 مليار دولار من بداية عملها في مصر بواقع مليار دولار في السنة وكشف أنه إعمار مصر هتستثمر مليار دولار في مصر خلال 2025 وقال كمان إن فيه  اهتمام كبير بفرص الاستثمار اللي بتدرس مصر إطلاقها في البحر الأحمر وتبنأ العبار إن مصر هتكون قبلة السياحة الخليجية في الفترة الجاية وإن المشروعات الجديدة هتغير شكل ومسار الاقتصاد المصري كله وكشف كمان إن نسبة 60% من الأشخاص زاروا  الساحل الشمالي المصري لاول مرة ودا رقم مهم جدا ومؤشر على مستقبل المنطقة وقال إن مصر عندها فرصة لجذب السياحة الخليجية غزيرة الانفاق واستشهد ان إنفاق السياح الخليجيين بالخارج يبلغ  90 مليار دولار وشايف إن مصر تقدر تجذب رقم كبير من المبلغ دا كل سنة.

العبار كشف كمان إن استثمارات مشروع مراسي بالساحل الشمالي بلغت 15 مليار دولار وإن  عدد الوحدات في مراسي وصل إلى 10 آلاف وحدة سكنية بالإضافة إلى 9 فنادق، والمشروع بيشتغل فيه  20 ألف موظف، وإن عدد الزوار في مراسي بالساحل الشمالي وصل إلى أكتر من 1.7 مليون زائر، وإن نسبة إشغال كل الفنادق 100%، ودا شجعهم على تمديد فترات السياحة وزيارة مراسي لاستقبال الزوار حتى آخر سبتمبر وشايف أن دا مؤشر مهم على الوضع اللي هيكون عليه كل ساحل البحر الشمالي لمصر ونقدر ساعتها نتخيل الأرقام هتكون عاملة إزاي.