يا ترى ليه الدهب بيواصل الارتفاع ومكمل في طريقه ومش عاوز يقف؟ وليه العالم كله مستمر في الرهان عليه؟ وايه السر  في المعدن الأصفر اللي بيخلي الكل يلجأ ليه في الأوقات الصعبة؟ وهل هيفضل يرتفع ولا ممكن يتراجع؟

في 2024 الدهب مش بس احتفظ بمكانته.. ده ارتفع 35% مع نهاية العام.. و قفز لقيمة جديدة تخلت عن المستويات القديمة ووقف عند 2650 دولار للأونصة… ده معناه إنه في سنة واحدة الدهب كان عامل زي السهم اللي بيصعد لأعلى نقطة.

وايه اسباب الصعود الجنوني ده لأسعار الدهب؟

السبب الأول في الارتفاع ده هو استمرار التوترات الجيوسياسية والاقتصادية في العالم.. مثلاً التوترات الجيوسياسية زي حرب أوكرانيا اللي خلّت دول زي الصين وروسيا والمجر وبولندا تزيد من شراء الدهب.. ودي مش مجرد تصرفات عشوائية.. دي دول مستعدة لأي انهيار اقتصادي عالمي عشان الدهب بالنسبة ليهم بقى أداة الأمان في ظل المخاوف من النظام المالي العالمي اللي ممكن يحصل فيه تغييرات جذرية قريب.

كمان من ضمن اسباب صعود الدهب ان  أسعار الفائدة العالمية بتقع..  وده خلا البنوك المركزية تركز أكتر على شراء السبائك الذهبية.. وفي 2024 السعر طار لأكتر من 2600 دولار للأونصة لأن العالم كله كان بيشوفه كملاذ آمن.

لكن السؤال المهم..  هل الارتفاع ده هيفضل مستمر؟

الإجابة مش واضحة بس مؤسسة "جولدمان ساكس" متوقعة إن الدهب  في 2025 هيتجاوز الـ3000 دولار.. وكده تبقى الإجابة واضحة.. الدهب مش بس نجح في 2024 ده مستمر في تقديم نفسه كملاذ أمن للناس اللي خايفة من المستقبل.

طب بالنسية للدهب فى مصر إيه الأخبار؟

طبعا مع الزيادة الكبيرة في أسعار الدهب عالميا أسعاره في مصر مش بعيدة عن ده.. ولكن اللي بيفرق هنا إن الزيادة دي بتأثر على السوق المصري بشكل خاص.. الكل بقى مهتم بالدهب كوسيلة للحفاظ على المدخرات خصوصًا مع ارتفاع الدولار وحالة عدم اليقين اللي بنعيشها.. وفي الفترة الجاية هتلاحظ إن سعر الدهب في مصر بيواكب الارتفاعات العالمية وده بيأثر بشكل مباشر على شراء الناس للمعدن النفيس.

في النهاية حتى لو كنت مش مستثمر أو مش مهتم بالدهب فمهم تعرف إن المعدن ده مش بس للزينة أو الأغراض التقليدية.. ده بقى جزء من استراتيجية البنوك المركزية فى العالم كله للحفاظ على الاستقرار المالي.. وده بيعكس حاجة واحدة الدهب مش مجرد معدن ده أداة للحفاظ على القيمة في وجه الأزمات.

وخليني فى الآخر أقولك ان الدهب بيوصل كل سنة لأرقام قياسية، وفي  2025 مش مستبعد إن الأسعار توصل لمستويات أعلى بكتير من اللى عليها دلوقتى وكل اللى لازم تعملوا انك تراقب اللى بيحصل فى اسعار المعدن النفيس وتشوف القرار المناسب اللى ممكن يخدم استثماراتك.